Edhe për qershorin nuk ka projekt për Reformën në Drejtësi

Drafti i Reformës në Drejtësi nuk do të jetë në kalendarin e punimeve 3-javore të parlamentit. Konferenca e Kryetarëve e miratoi sot kalendarin, pa draftin që kryeministri Rama tha se do ta çonte në parlament pas dështimit të negociatave me kryetarin e opozitës, Lulzim Basha. Një ditë më parë ambasada amerikane e mbështeti vendimin e Ramës për ta çuar draftin në kuvend. Por mazhoranca nuk i ka votat e mjaftueshme për ta votuar atë dhe një dështim do të thotë shtyrje me të paktën 1 vit të reformës.

Ambasada e SHBA dhe BE u kanë bërë thirrje deputetëve të mbajnë qëndrime individuale mbi reformën, ndërsa opozita ka paralajmëruar se në qoftë edhe sikur një deputet i saj të bëhet pjesë e “trafikimit” të votës dhe të votojë reformën, ajo do të djegë të gjitha mandatet e tjera, çka do ta fuste vendin në një krizë të thellë politike.