Erion Braçe: Bordi i Transparencës as komunist, as fashist, por çmimi i naftës duhet riparë

Deputeti i Partisë Socialiste, Erion Braçe, ka folur në Kuvend lidhur me bordin e Transparencës që vendos çmimet e karburanteve në vend.

Sipas Braçes bordi nuk është as fashist e as komunist, por duhet që të mbrojë qytetarin, teksa nuk e mohoi se ka pasur abuzime me rritjen e çmimeve.

“Bordi, ky që po diskutojmë sot me akt normativ, por edhe bordi tjetër që merret me çmimin e karburanteve janë instrumente të mbështetura në ligj. As fashiste dhe as komuniste. Bordi nuk rrit çmimet, ka vetëm një qëllim të mbrojë qytetarin nga abuzimet. Ka raste që e ka bërë dhe ka raste që do i tregoj që nuk e ka bërë. I kërkoj qeverisë publikisht të aprovojë garancinë sovrane por është nevojë jetike tani për shkak të përdorimit të drithit si armë atje në fushë të betejës. E kërkoj prej kostos të këtij viti që i ka detyruar bujqit të mbjellin dhe të diskutojnë që tani për çmimin. Kam që në tetor që e them. Kostoja bazë e grurit ka dalë me 1200 lekë, por prodhimi bazë, ilaçet dhe plehrat kimikë zënë 60% të kësaj kostoje. 30 lekë ka bërë një kilogram grurë vjet te bujqit. Me çmimin e vjetshëm i jep vetëm 15 mijë lekë të ardhura bujqëve për dynym”, shtoi Braçe.