Familjarët marrin statusin ”Dëshmor i Atdheut” dhënë për Anri Kashnikun, Rama: 18-vjeçari u bë hero i shqiptarëve

Në një ceremoni në Kryeministri, këtë pasdite të së enjtes, kryeministri Edi Rama u ka dorëzuar familjarëve të 18-vjeçarit Anri Kashniku, statusin e shpalljes së tij si ”Dëshmor i Atdheut”, pas aktit human të shpëtimit të dy të miturëve, por humbi jetën në detin e trazuar të Durrësit pak ditë më parë. Rama tha se Anri nuk u bë hero vetëm i vëllait që e shpëtoi, por i të gjithë shqipatërve.

“Nuk ishte vetëm familja, të afërmit, miqtë, shokët, komuniteti i zonës, ishte e gjithë Shqipëria që u prek me zemër dhe që me mendje qëndroi për një moment tek ky i ri që sikundër më tregoi babi kishte pasion futbollin. Donte të bëhej një futbollist i mirë dhe i njohur dhe që nuk ia doli dot sepse rrethanat fati e vendosën. Ai u bë heroi i të vëllait, por edhe heroi i të gjithë shqiptarëve.

Përfitimi i këtij statusi të dëshmorit nuk e shuan pikëllimin e thellë të familjarëve, dhimbjen, por mbase lehtëson sado pak një plagë që fatkeqësisht do qëndrojë aty në zemrën e babit, familjarëve, vëllait dhe të afërmve. Nga ana tjetër është një detyrim i yni që të nderojmë çdo shqiptar, në radhë të parë këta lloj shqiptarësh, njerëz të zakonshëm, babi i Anrit është një burrë punëtor në emigracion.

Qeveria është zotuar që ti mbrojë fëmijët e të rënave kudo në Shqipëri, por në këtë rast Anri vetë ishte një fëmijë dhe ashtu si të tjerë heronjtë të këtyre ditëve edhe ai u bë një simbol i një vetëmohimi ekstrem për të përmbushur një mision që disave si mjekëve që humbën jetën gjatë pandemisë”.