Franca dërgon delegacion në Shkup për negociatat: Presim të realizoni reformat

Pas bllokimit të procesit të negociatave për Shqipërinë dhe Maqedoninë e Veriut, zyrtarë francezë kanë mbërritur këto ditë në Shkup. Zëvendës kryetarja e Senatit Francez, Helene Konvej Mouret ka zhvlluar sot takime me përfaqësues të partive politike dhe institucioneve të Maqedonisë së Veriut.

Zëvendës kryetarja e Senatit Francez nuk ka folur për mediat, por ambasadori i Francës në Shkup ka theksuar se reformat mbeten kriteret kryesore për negociatat. “Mbetet tek partitë më të mëdha politike të merren vesh për mënyrën e zgjedhjeve po ashtu të merren vesh për luftën kundër korrupsionit, gjyqësor i cili me sukses do të ballafaqohet me korrupsionin. E di që kjo rrugë është e gjatë por ne jemi në anën tuaj që t’u ndihmojmë për këtë. E dini që ekziston procesi i revizionit të BE-së dhe nëse jepen pika pozitive deri në muajin maj edhe nga ana juaj edhe nga ana jonë, mendoj se do të arrijmë të marrim lajme të mira”,- deklaroi Kristijan Timonie, Ambasador i Francës në Shkup.

Qëndrimin e tillë ambasadori Timonie e shprehu në prezencë të zëvendës kryetares së Senatit francez, Helene Konvej Mouret, e cila ndodhet për vizitë në Maqedoni. Senatorja franceze, takoi në Kuvend, përfaqësuesit e disa Komisioneve. Hari Llokvenec, kryetar i Komisionit për Mbrojtje dhe Siguri, tha se pas në takim me senatoren Mouret  është konstatuar që alternativë e vetme e vendit është integrimi në BE.

“Senatorja franceze deklaroi se ata nuk do të dëshironin të kenë vende kandidate të cilat shumë gjatë do të negocionin për anëtarësim, siç e bënë tani Turqia. Duan të jenë më të sinqerta me vendet e tanishme kandidate dhe ta ofrojnë atë që për ata realisht do të jetë e pranueshme, ndërsa për ne e realizueshme”,- tha pas takimit me delegacionin francez, Antonio Milloshovski, përfaqësues i Komisionit për Politikë të Jashtme në Parlamentin e Maqedonisë së Veriut.

Koha Jonë