Kandidati i koalicionit ”Bashkë Fitojmë”, Cara: Bashkia e Durrësit po përdoret si pronë. Betejën e kam me Dakon

Kandidati i koalicionit “Bashkë Fitojmë” për bashkinë e Durrësit, ish-deputeti Igli Cara thotë se betejën nuk e ka me Emiriana Sakon, por me Vangjush Dakon. Për të duhet të ndryshojë filozofia e trajtimit të bashkisë sikur të jetë një pronë e kryetarit.

”Së pari, betejën se kam thjesht me Sakon, por dhe me Dakon, jo personalisht, por për filozofinë e drejtimit të bashkisë së Durrësit. Bashkia ka kohë që drejtohet sikur ta kenë pronë të tyren. E trajtojnë sikur e kanë të veten. Filozofia është të mos e trajtosh si ta kesh pronë por ta kthesh në shërbim të qytetarëve. Pronarët e vërtetë janë qytetarët. Ditën që ata votojnë është dita që ata të firmosin je apo jo administrator i tyre por nuk je pronar i tyre. Në këto 16 vite të Dakos dhe 4 vite të Sakos, ku duket që është përsëri Dako mbrapa, është e njëjta filozofi. Vetëm një grup njerëzish që marrin përfitime, investime pa kriter”, tha ai për ”Abc News”.

Po ashtu Cara u pyet gjithashtu nga gazetarja edhe për procesin e rindërtimit. Sipas tij, kryeministri Edi Rama nuk i ka mbajtur premtimet ndërsa premtoi se brenda vitit 2024 do të mbyllë përfundimisht procesin e rindërtimit në këtë qytet.