Një akt i qartë kërcënimi është regjistruar në fshatin Sektor të Velipojës, ku një kurorë me lule – simbol tradicional i vdekjes – është lënë në portën e banesës së prindërve të Emiljano Nikës, drejtor i Inspektoratit Kombëtar të Mbrojtjes së Territorit (IKMT) në Shkodër. Ngjarja është kallëzuar menjëherë në polici dhe konsiderohet një paralajmërim i drejtpërdrejtë për hakmarrje.
Emiljano Nika është një nga zyrtarët që ka drejtuar aksionet e fundit për prishjen e ndërtimeve pa leje në zonën e mbrojtur të Thethit, operacione që janë shoqëruar me tensione të larta dhe kundërshtime të forta nga banorët e zonës.
Policia e Shkodrës ka konfirmuar se “Me datë 18.07.2025, shtetasi E. N., 44 vjeç, banues në Shkodër, ka kallëzuar se në banesën ku jetojnë prindërit e tij, në fshatin Sektor, Velipojë, është vendosur një kurorë me lule mbi kangjellat e portës. Vijojnë hetimet për zbardhjen e plotë të rrethanave dhe identifikimin e autorit.”