KQZ: Zgjedhjet në Dibër, partitë respektuan afatin ligjor

Komisioni Qendror i Zgjedhjeve ka dhënë paraditen e sotme një informacion zyrtar për organizimin e zgjedhjeve për kryetar të Bashkisë Dibër.

“Partitë politike respektojnë afatin ligjor, dorëzojnë në KZAZ nr. 19 propozimet për anëtarëve të KQV-ve”, ka komunikuar ky institucion.

Duke shtuar se dje ka përfunduar afati për paraqitjen e propozimeve për anëtarë të Komisioneve të Qendrave të Votimit pranë KZAZ-së nr. 19 në Dibër, për zgjedhjet e pjesshme në Bashkinë Dibër, të datës 11.09.2016.

“Komisioni Qendror i Zgjedhjeve, bën me dije se në zbatim të Kodit Zgjedhor dhe akteve të KQZ-së në fuqi, pranë KZAZ-së nr. 19, Dibër, kanë paraqitur të gjithë propozimet e tyre për anëtarët e Komisioneve të Qendrave të Votimit që do të ngrihen për zgjedhjet për kryetar të bashkisë Dibër, Partia Socialiste, Partia Demokratike, Lëvizja Socialiste për Integrim dhe Partia Republikane.

Komisioni Zonal i Administrimit Zgjedhor (KZAZ nr.19) po përpunon dokumentacionin përkatës, për të verifikuar përmbushjen e kritereve ligjore për propozimet për anëtarë të KQV-ve”, sqaron gjithashtu KQZ-ja.

Duke përfunduar me faktin se menjëherë pas emërimit të tyre, KQZ-ja do të trajnojë të gjithë komisionerët e Qendrave të Votimit, mbi aspekte të ndryshme të Kodit Zgjedhor dhe procesit zgjedhor në tërësi.