Kredi me 0% interes për administratën, ministri Gonxhja: Prioritet, arsimtarët, mjekët, ushtarakët e artistët

Ministri i Ekonomisë, Kulturës dhe Inovacionit, Blendi Gonxhja thotë se 300 punonjës të administratës publike do të përfitojnë kredi me interes zero për blerjen e banesës. Për të ky vendim përbën një hap pozitiv për mbështetjen e profesionistëve të administratës publike, , duke u siguruar atyre mundësinë për të jetuar në kushte më të mira.

“Një hap pozitiv për mbështetjen e profesionistëve të administratës publike, nëpërmjet një programi të veçantë që ofron kredi me 0% interes për blerjen e banesave, me qëllim përmirësimin e cilësisë së jetës së punonjësve, duke u siguruar atyre mundësinë për të jetuar në kushte më të mira dhe më të sigurta, pa u shpenzuar për interesat e kredisë”,-shkruan në një postim në Facebook.

Ministri theksoi se përfituesit do të përzgjidhen në bazë të sistemit të pikëzimit dhe vëmendje të veçantë në këtë proces do të kenë arsimtarët, mjekët, infermierët, policët, ushtarakët, garda, veterinerët, artistët, etj.

Këto kuota do të jenë të përvitshme, falë financimit nga buxheti i shtetit, miratuar në mbledhjen e një dite më pare të Qeverisë. Gonxhja tha se për të përfituar nga ky program shume shpejt do të mundësohet aplikimi online përmes platformës e-albania.al.