Kreu i kuvendit uron për Krishtlindje, ftesa për koalicion, Meta: Sot është ditë shprese

Një urim për besimtarët e krishterë ka ardhur edhe nga Kreu i Kuvendit, Ilir Meta.  Në mesazhin e tij, kreu i kuvendit ka theksuar se sot është ditë shprese, përballë sfidave.

“Uroj më shumë paqe, harmoni dhe mirëkuptim për të gjithë shqiptarët në këtë ditë mjaft të rëndësishme, e në veçanti më shumë vëmendje dhe mbështetje për ata më të pamundurit, që janë në një gjendje të vështirë. Sot është një ditë reflektimi dhe shprese, teksa jemi përballë sfidave. Vështirësite për të qenë më të integruar në shoqërinë tonë duhen tejkaluar, për të qenë të gjithë të barabartë”, tha Meta.

Edhe pse ditë feste, z.Meta është përgjigjur interesimit të gazetarëve, për ftesën që kryeministri Rama i bëri për koalicion.

“Zoti Rama ju bëri një ftesë publike për koalicion ka LSI një qëndrim për këtë?”, u pyet Meta.

“Unë mendoj se sot është dita e shpresës për të gjithë, i uroj të gjithëve mbarësi dhe solidaritet”, u përgjigj ai.