Kryemadhi: Kryeministri në sulm kundër lirisë së medias

Politikë E Shtunë, 30 Nëntor 2019 19:59

Kryetarja e LSI, Monika Kryemadhi ka reaguat për qëndrimet e qeverisë ndaj medias ditëve të fundit. “Krahas fatkeqësisë së jashtëzakonshme të tërmetit të 26 Nëntorit, i gjithë opinioni publik po përjeton edhe një sulm violent të Kryeministrit ndaj mediave, veçanërisht atyre sociale. Përdorimi i një situate tragjike të përmasave të tilla, si një shkak për të mbyllur gojën mediave është një tronditje e vërtetë për lirinë e medias në Shqipëri, që do të thotë liri e shprehjes dhe e informimit”,- shkruan kryetarja e LSI në një mesazh në rrejtet sociale.

Deklarata e plotë e kryetares së LSI

Kryeministri në sulm kundër lirirsë së medias.

Krahas fatkeqësisë së jashtëzakonshme të tërmetit të 26 Nëntorit, i gjithë opinioni publik po përjeton edhe një sulm violent të Kryeministrit ndaj mediave, veçanërisht atyre sociale.

Përdorimi i një situate tragjike të përmasave të tilla, si një shkak për të mbyllur gojën mediave është një tronditje e vërtetë për lirinë e medias në Shqipëri, që do të thotë liri e shprehjes dhe e informimit.

Mbyllja e JOQAlbania, censurimi i editorialit të analistit Adrian Thano apo burgosja e aktivistes Xhulia Aliaj për postimin e një shkrimi të një media të huaj shumë prestigjoze si “Avenire”, janë dëshmi tronditëse të një autoritarizmi të shfrenuar.

Mbështes lirinë e plotë të medias dhe dënoj censurën në të gjitha format e saj, pasi censura e medias është prova e pakundërshtueshme e vendosjes së autoritarizmit dhe goditjes së themeleve të demokracisë.

Arrestimi i aktivistes Xhulia Aliaj dhe shpallja në kërkim sikur të ishin kriminelë e dy administratorëve të JOQAlbania Erland Dalliu dhe Gentian Çengeli, dëshmojnë për një histeri autoritare që keqpërdor edhe tragjedinë e tërmetit për qëllimet e saj të mbrapshta të mbajtjes së pushtetit me çdo kusht.

Ka vetëm një përgjigje, ka vetëm një qëndrim, ka vetëm një veprim që duhet të kryhet. Të lirohet menjëhere aktivistja Xhulia Aliaj, të zhbllokohet JOQAlbania si dhe të ndalet censura kudo dhe ndaj çdo media që ajo shfaqet.