Kryeministri Rama: Shqipëria sot prodhon më shumë arkitekturë se sa gjithë Europa bashkë

Kryeministri Edi Rama u shpreh se Shqipëria sot prodhon më shumë arkitekturë se sa gjithë Europa bashkë, ndërkohë që hedh gjithë hapat përfundimtare që ende e ndajnë nga Olimpi europian.

Gjatë punimeve të festivalit “Bukë dhe Zemër”, Rama i uroi mirëseardhjen arkitektëve nga gjithë bota në zemrën pulsuese të Tiranës.

“Sot këtu nisim së bashku një aventurë të re për të krijuar një hapësirë në formë shpirtërore e jo një hapësirë ku duhet ndërtuar arkitektura, por duhen dëgjuar arkitektët. Të dëgjohen se cila mund të jetë lëvizja tjetër për t’u marrë në konsideratë apo për t’u braktisur, hapi tjetër për t’u hedhur apo për t’u shmangur, sfida tjetër për t’u përqafuar apo për t’u lënë të shkojë. Dikush ndoshta mund të bëjë pyetjen a kanë të bëjnë këto dilema me arkitekturën, jetën apo me diçka krejt tjetër”, tha Rama.

Në përgjigje të kësaj pyetje, Rama tha se nuk sheh vija të mprehta ndarëse midis tyre.

“Kur flas për arkitekturën gjej shumë pak që qëndron jashtë prekjes së saj. Ndoshta e kam gabim apo jam krejt i njëanshëm, i mbërthyer nga tërheqja e arkitekturës dhe mendjes që e prodhojnë, megjithatë mund t’ju them pa hezitim që të dëgjosh arkitektë të vërtetë e të gjurmosh procesin e tyre krijues është një formë e jashtëzakonshme edukimi jashtëkurikular në politikbërje. Të kuptosh forcat me të cilat përballen, të natyrës dhe të vullnetit njerëzor, është t’u hedhësh një sy të gjithë atyre mënyrave që duhen për të marrë vendime, për të ndjekur tensionin në harkun e kompromiseve që duhet të ndjekim, që nga grima e një ideje që lind deri te terreni i brishtë i realitetit, pa prishur atë, por duke e bërë të qëndrojë ashtu krenar. Është një masterplan rezistence për këdo që është i vendosur t’i japë formë ëndrrës së vetë”, shtoi Rama.

Rama nënvizoi se “jemi këtu për të vënë një bast shumë të fortë për arkitekturën si një katalizator në një shoqëri ku duhet negociuar dhe rinegociuar marrëdhënia, qoftë shpirtërore ashtu edhe territoriale, duke mësuar nga e shkuara dhe duke u përballur me të ardhmen”.

“Në fakt kemi gjetur një emër për hapësirën që kemi nisur të krijojmë, festivali ‘Bukë e zemër’. Gjetëm edhe një moto: ‘sillni pak kripë ju lutem’. Shprehja bukë e kripë e zemër është trinia e mikpritjes së shenjtë shqiptare që ka mbajtur frymën tradicionale të kësaj toke dhe kodin tonë të nderit që na kërkon të mikpresim miq duke ndarë gjithçka kemi, por jo më pak se bukë për stomakun, kripë për shije dhe çfarë ka më rëndësi zemër për sigurinë e tyre”, tha Rama.

Ndërkohë kryeministri e cilësoi eventin e sotëm në Tiranë me një ushtri të fuqishme arkitektësh, si një rrekje për të pushtuar të ardhmen që ka ndalur për një moment për t’i dhënë jetë një festivali.

“Përveç vizionit dhe motos ky festival ka edhe misionin që përveç bukës dhe zemrës të formësojë një destinacion, një të ardhme këtu në Shqipëri. Është për arkitektët, por ka të bëjë edhe me atë që i trazon, i shqetëson, i zemëron, provokon dhe frymëzon ata. Ka diçka që është trazuese por po kështu ngre pikëpyetje. Fjala e përbashkët duket tashmë sikur është e pakapshme, duket sikur individualizmi kuron disa dhoma ekologjike dhe ndërkohë ajo që është e përbashkët po na rrëshket gishtash. Jo domosdoshmërisht nga dashakeqësia, por përmes shkatërrimit, përmes lodhjes e harresës, kemi harruar si të dëgjojmë, si të mos biem dakord për të krijuar, si të ndërtojmë pa dominuar, si të ndajmë pa dyshuar ndonjëherë. Ata që shpëtojnë fjalën e përbashkët e bëjnë këtë për të krijuar ndasi më të thella, për të ndarë në mënyrë dashakeqe, për të krijuar kufij”, deklaroi Kryeministri Rama.

/a.g/