Kryetari i Kuvendit Ilir Meta reagon për aktin terrorist të ndodhur sot në Francë

Kryetari  i Kuvendit të Shqipërisë, z. Ilir Meta mësoi me trishtim  të thellë për ngjarjen tragjike të ndodhur në ditën e sotme në Paris, Francë.

Z. Meta e konsideroi atë një akt shumë të rëndë terrorist dhe si të tillë, të dënueshëm.

"Në këto çaste të rënda, ngushëllimet më të thella shkojnë për të afërmit e viktimave dhe lutje për shërimin sa më shpejtë të të lënduarve”, tha z. Meta.

Kryetari i Kuvendit u shpreh se akti terrorist kundër qytetarëve të pafajshëm dhe për më tepër kundër medias së lirë kërkon ndëshkim maksimal të autorëve dhe frymëzuesve të tyre.

“Demokracia perëndimore në përgjithësi, toleranca e bashkëjetesa mes të ndryshmëve në origjinë, bindje apo dhe përkatësi fetare dhe liria e fjalës në veçanti, janë institucione të cilat qëndrojnë në themel të së sotmes dhe të ardhmes evropiane dhe ato nuk mund të kërcënohen e shantazhohen nga asnjë ndërhyrje nga jashtë”, tha z. Meta.

Shqipëria gjen rastin të shprehë bindjen e saj të pandryshuar dhe rreshtimin e saj të hershëm në koalicionin e madh demokratik kundër terrorizmit dhe terrorit të të gjitha ngjyrave.