Kur hiqen “rraqet” e tepërta në Lungomare të Vlorës…

Rruga bregdetare e njohur si Lungomare në Vlorë është shndërruar tashmë në një nga shembujt më domethënës të transformimit urban në Shqipëri, duke dëshmuar se zhvillimi i një hapësire publike nuk ka pse të jetë i dhunshëm, kaotik apo estetikisht i dyshimtë.

Vendimi i kryeministrit Rama këto ditë për të hequr kudo barrierat e kota dhe arkaike që bllokonin hapesirat për qytetarët, ka sjellë spastrimin e tyre duke iu dhënë jetë e bukuri jo vetëm Lungomares por edhe zonave të tjera.

Ndërkohë kjo foto është e ditës së djeshme në Lungomare, pas aksionit kundër “kioskezimit” të qytetit.

Ajo që dikur ishte një zonë e ngarkuar me kioskëzime të shumta, ndërtime të përkohshme, barrikada dhe struktura të paautorizuara, sot është një hapësirë e hapur, e pastër dhe funksionale për të gjithë. Sekreti i këtij transformimi nuk qëndron në shtesa të shumta, por përkundrazi, në heqjen e tepërtës – eliminimin e ndërtimeve pa leje, strukturave të shëmtuara dhe çdo elementi që pengonte frymëmarrjen urbane.

Të gjithë kanë hapësirën e tyre: qytetarët dhe banorët e Vlorës kanë përfituar një zonë të gjerë për shëtitje, çlodhje dhe rekreacion buzë detit. Vizitorët dhe turistët ndihen më të mirëpritur në një ambient të rregullt dhe mikpritës. Ndërkohë, njësitë e shërbimit – kafet, restorantet dhe bizneset sezonale – janë pozicionuar në mënyrë më të organizuar dhe tërheqëse, duke funksionuar në një mjedis të çliruar nga rrëmuja.

Ky projekt tregon qartë se kur përballë frymës së kaosit vihet një vizion i qartë urbanistik dhe një standard estetik bashkëkohor, qyteti fiton. Lungomare është më shumë se një shëtitore: është një dëshmi e asaj çfarë mund të bëhet kur hapësira publike trajtohet me respekt dhe përgjegjësi.

Për Vlorën dhe qytete të tjera bregdetare, ky transformim mbetet një model që ia vlen të ndiqet – jo me më shumë ndërtime, por me më pak barrikada dhe më shumë qytetari.