Largimi i Komandantit të Flotës Detare, sqaron presidenca: I mbaroi mandati

Presidenca ka sqaruar se largimi i Gjeneral Major Ylber Dogjani nga Komandantit të Forcave Detare, është bërë vetëm për shkak të mbarimit të mandatit.

Me një deklaratë publike, këshilltari i Sigurisë Kombëtare të Presidentit, Bahri Shaqiri ka theksuar se largimi i Dogjanit është vetëm për shkak të mbarimit të mandatit dhe asnjë arsyeje tjetër.

Deklarata e plotë e Presidencës:

Sqarim i Këshilltarit për Sigurinë Kombëtare të Presidentit të Republikës, z.Bahri Shaqiri

Gjeneral Major Ylber Selman Dogjani është shkarkuar nga detyra e Komandantit të Forcave Detare, vetëm për shkak të mbarimit të mandatit.

Lirimi i tij nuk ka lidhje me asnjë pretendim tjetër, të ngritur dhe në disa media, se shkarkimi gjoja lidhet me shkelje ligjore.

Presidenti i Republikës nëse do kishte patur bindjen për një shkelje ligjore sado të vogël nga Gjeneral Major Dogjani, do e kishte shkarkuar atë menjëherë, dhe jo kur të plotësonte afatin e tij në krye të Forcave Detare.

Presidenti Meta shpreson se pasuesi i Gjeneral Major Dogjanit i cili do t’i propozohet në këtë detyrë, jo vetëm të ketë integritetin e duhur, por të jetë plotësisht i karrierës në Forcat Detare.

Një nga detyrat kryesore të Presidentit është edhe mbrojtja e integritetit të ushtarakëve nga presionet dhe lojërat politike.