Largimi i Xhafajt, Bushatit dhe futja në lista e Rrajës/Rama-gazetares: Do të ndalojmë hyrjen si në Shtëpinë e Bardhë

Pasi mbrëmë dorëzoi listat e kandidatëve për zgjedhjet e 25 prillit, këtë të martë kryeministri Edi Rama po zhvillon një konferencë me gazetarët, por nuk ka pranuar t’u përgjigjet pyetjeve të gazetares Ambrozia Meta, e cila kërkoi një përgjigje për dy çështje.

E para, ishte largimi nga listat i figurave të PS si Fatmir Xhafaj dhe Ditmir Bushati, ndërsa e dyta, prania në listë e deputetëve të përfolur për lidhje me krimin në Durrës.

Kryeministri e ktheu pyetjen e gazetares në një replikë personale me gazetaren të cilës i dha edhe një paralajmërim, se në rast se do të vijonte me shkeljen e rregullave, do t’i ndalohej hyrja në konferencat e ardhshme.

Gazetarja: Fatmir Xhafaj në fund të listës, Ditmir Bushati, Pandeli Majko dhe Mimi Kodheli. Doni vetëm njerëz që t’ju binden? Sa ndikim ka patur Erion Veliaj në këto lista?

Edi Rama: Fakti që është shqetësuar Syri.net për ministrin tregon shumë. I pyeturi përgjigjet, nuk e negociojmë dot.

Gazetarja: Qarku i Durrësit janë tri emra që përfliten. Rrahman Rraja, Jyrgis Çyrbja dhe…

Edi Rama: Është praktikë ndërkombëtare që nga Shtëpia e Bardhë e kudo. Ndalimi i hyrjes në konferencë i gazetarëve që nuk respektojnë rregullat, që shkelin etikën e aktivitetit. Nuk hyn tek praktika ime që ta bëj këtë për ty, por të lutem mos shkel rregullat.

Gazetarja: Fatmir Xhafaj nuk ka lidhje me Syri televizion…

Edi Rama: Pyetje tjetër.