Lezha çel sezonin turistik 2025 me një festë shumëngjyrëshe në Shëngjin

Lezha çeli zyrtarisht sezonin turistik për vitin 2025 me një aktivitet festiv në Shëngjin, ku u ndërthurën kultura, muzika dhe promovimi i pasurive turistike të zonës. Ceremonia, e zhvilluar mbrëmjen e kaluar buzë Adriatikut, mblodhi personalitete të jetës politike dhe diplomatike nga Shqipëria, Kosova, Maqedonia e Veriut dhe Lugina e Preshevës, si dhe dhjetëra vizitorë e pushues nga trevat shqiptare.

Në mesin e të ftuarve ishin ministri i Drejtësisë, Ulsi Manja; ish-kryetari i Kuvendit të Maqedonisë së Veriut, Talat Xhaferri; kryetarja e komunës së Preshevës, Ardita Sinani; kryetari i komunës së Suharekës, Bali Muharremaj; ambasadori i Kosovës në Shqipëri, Skënder Dyrmishi, si dhe shumë figura të tjera publike.

Kryetari i Bashkisë së Lezhës, Pjerin Ndreu, në fjalën e tij përshëndetëse, u shpreh se “Shëngjini, Talja dhe Lezha kanë pësuar ndryshime rrënjësore vit pas viti. Jemi krenarë për progresin që kemi bërë në zhvillimin e turizmit, por mbetemi të vetëdijshëm se përpara kemi ende shumë punë. Nuk do të ndalemi në përmirësimin e infrastrukturës, pasurimin e ofertës turistike dhe krijimin e një ambienti gjithnjë e më komod dhe atraktiv për pushuesit”.

Atmosfera festive u ndez nga performancat e artistëve të njohur Luiz Ejlli dhe Teuta Selimi, të cilët sollën një repertor të dashur për publikun, duke dhuruar momente të paharruara për të pranishmit.

Pjesë integrale e festës ishte edhe Panairi i Artizanatit dhe Kulinarisë Tradicionale, ku prodhues vendas ekspozuan vlerat autentike të trashëgimisë kulturore të zonës – nga punimet artizanale te gatimet karakteristike të Lezhës dhe më gjerë. Produktet vendore, verërat artizanale, vaji i ullirit, djathi tradicional dhe shijet mesdhetare të kuzhinës bregdetare u mirëpritën nga vizitorët.

Në hapësirat e aktivitetit, operatorët turistikë prezantuan paketat dhe ofertat për sezonin e ri, duke synuar të tërheqin jo vetëm pushuesit vendas, por edhe turistë nga rajoni dhe më gjerë. Investimet në akomodim, guida turistike, plazhe të certifikuara dhe aktivitete sportive e rekreative po e kthejnë Lezhën në një destinacion të rëndësishëm për turizmin shqiptar.

Lezha, e bekuar me resurse të shumta natyrore, historike dhe kulturore, përfshirë lagunat, malet, monumentet e natyrës, kalatë, dhe sitet arkeologjike, mbetet një prej zonave më të preferuara nga pushuesit – veçanërisht ata nga Kosova, të cilët çdo vit zgjedhin brigjet e Shëngjinit për pushimet verore.

Sezoni turistik 2025 në Lezhë është hapur me shpresën dhe përkushtimin për një verë të sigurt, të pasur dhe të paharrueshme për të gjithë vizitorët.
AV