”Libohovën e kishte harruar edhe Zoti”, Rama: Sot turistë nga të katër anët e botës, hedhin valle mbi qilimin e gurtë të Rilindjes Urbane

Kryeministri Edi Rama, këtë mbrëmje ka postuar një video nga Libohova dhe ka rikujtuar vizitën e parë si kryetar i i opozitës, dhe thotë se në këtë vend pa atë që kishte parë në shumë qytezat e Shqipërisë, që ”i kishte harruar edhe Zoti”. Rama thotë se sot janë turistë nga të katër anët e botës dhe vizitorë që jo vetëm ngjiten në qytezën e veçantë, por edhe hedhin valle mbi qilimin e gurtë të Rilindjes Urbane.

Postimi i plotë

Kur kam shkuar për herë të parë në Libohovë, si kryetar i opozitës, ishte si një nga shumë qytezat e Shqipërisë që “i kishte harruar edhe Zoti”, me kishën e mahnitshme që po binte në vetmi, rrugën kryesore ku asfalti dukej si lëkurë e shqyer krokodili, shtëpitë si fantazma nën muret e murrme të kalasë së heshtur të Shanishasë dhe njerëzit si hije nëpër diell.

Të flisje për një të ardhme me turizëm e për turistë të huaj që do të ngjiteshin deri aty ku edhe gurët kishin marrë rrugën teposhtë, ishte si të premtoje zbritjen e marsianëve me mushka fluturuese për të shijuar natyrën, traditat dhe ushqimet e Libohovës.

Sot nuk janë marsianët po janë turistë nga të katër anët e botës dhe vizitorë që jo vetëm ngjiten në qytezën e veçantë, për të shijuar bukurinë magjepsëse të kishës së restauruar, historinë, natyrën dhe mikpritjen libohovite, po edhe për të hedhur valle në mbrëmje mbi qilimin e gurtë të Rilindjes Urbane, që pret përditë miq të rinj, aty ku deri dje vetëm përcilleshin përmes gropave e pluhurit të mbeturit që shkonin për në banesën e fundit.