Ligji për minoritetet, Dule: Duhet gjithëpërfshirje dhe përgjegjshmëri

Kryetari i Partisë Bashkimi për të Drejtat e Njeriut Vangjel Dule, deputeti i Lëvizjes Socialiste për Integrim Vangjel Tavo dhe përfaqësues të minoritetit grek, janë mbledhur për të diskutuar mbi draft ligjin për minoritet, i cili është në fazë hartimi nga Ministria e Jashtme.

Dule, tha se  drafti do të analizohet në detaj nga të gjithë faktorët për të siguruar të drejta themelore të minoriteteve.

“Çështja që po trajtojmë është i një rëndësie madhore për minoritetin etnik grek, për minoritetet në Shqipëri, po edhe për vetë demokracinë dhe respektimin e të drejtave të njeriut dhe të minoriteteve.

Bëhet fjalë për përgatitjen e opinionit të minoritetit etnik grek dhe të gjithë faktorit politik të tij në lidhje me ligjin që po përgatitet për sanksionimin e të drejtave të pjesëtarëve të pakicave kombëtare në vendin tonë.

Rrjedhimisht është rëndësia e këtij akti ligjor që kërkon një përgjegjshmëri dhe përfshirje sa më të gjerë që të jetë e mundshme”- u shpreh Dule.

Ndërsa kryetari i Shoqatës OMONIA Leonidha Papa, tha se takimi synon arritjen koordinimin dhe dakortësinë e përbashkët për një draft të plotë propozimesh për ligjin për minoritetin.