Listat zgjedhore, Ivi Kaso: KQZ të bëjë detyrën dhe të verifikojë çdo kandidat

Politikë E Enjte, 11 Mars 2021 19:56

Sekretari për zgjedhjet i Partisë Demokratike, Ivi Kaso tha për Euronews Albania se në momentin që bëhet regjistrimi bëhet dhe verifikimi për përputhshmërinë ose jo të kandidimit me ligjin e dekriminalizimit dhe kjo është detyrë e Komisionit Qendror të Zgjedhjeve.

“Ne nuk kishim asnjë pritshmëri që vetë Kuvendi monkratik dhe kryeministri i cili ka futur kriminelët në parlament do të konstatonte papajtueshmërinë e mandatit të Tom Doshit me dispozitat ligjore por kemi besim që një organ i riformatuar i cili ka përgjegjësi për gjithë procesin zgjedhor siç është Komisioni Qendror i Zgjedhjeve në momentin e verifikimit të listave të kandidatëve të bëjë detyrat dhe të verifikojë papërputhshmërinë”, tha Ivi Kaso, Sekretari për zgjedhjet dhe kandidat për deputet i Partisë Demokratike.

Pyetur nga gazetarja se përse Tom Doshi nuk duhet të kandidojë kur ligji shqiptar nuk e pengon, Kaso pohoi se në këndvështrimin e tyre është pikërisht ligji shqiptar që nuk e lejon diçka të tillë.

Kandidati për deputet i PD-së, tha se koalicioni “Partia Demokratike – Aleanca për Ndryshim” do të garantojë rotacionin në zgjedhjet e ardhshme, rotacion që sipas tij e presin gjithë shqiptarët, duke qenë se qeverisja e këtyre tetë viteve ka përkeqësuar jetën në vend.