Presidenti serb, Aleksandër Vuçiç sulmoi të enjten ndërkombëtarët dhe kryeministrin e Kosovës, Albin Kurtit të cilin e quan ”llum terrorist” dhe vendosi që të bojkotojë samitin e BE-së, që do të mbahet në Tiranë më 6 dhjetor.
Edhe pse është tërhequr nga aktualiteti politik, ish-kryetari i PD-së, Lulzim Basha ka reaguar ashpër ndaj presidentit Vuçiç, për të cilin thotë se gjuha e përdorur ndaj kryeministrit Kurti është shumë e papranueshme. Për të kjo tregon se lidershipi serb është akoma i pandarë nga e shkuara.
“Gjuha e urrejtjes ndaj kryeministrit të Kosovës nga presidenti i Serbisë është e papranueshme. Ajo dëshmon se lidershipi serb nuk është ndarë nga e shkuara. Kosova është shtet i pavarur dhe askush nuk mund ti imponohet me gjuhën e dhunës. Është koha që serbët e Kosovës të shohin drejt së ardhmes dhe mirëqenies, e të mos pranojnë keqpërdorimin e tyre për llogaritë politike të së shkuarës fatkeqe”,-shkruan Basha.
Si pretekst për gjuhën e ashpër, Aleksandër Vuçiç ka përdorur emërimi i kryetarit të Partisë Demokratike Progresive, Nenad Rashiç si Ministër për Komunitete dhe Kthim në Qeverinë e Kosovës. Bashkimi Europian u ka bërë sërish thirrje liderëve politikë në Kosovë dhe Serbi që të përmbahen nga retorika nxitëse dhe të kenë “sjellje evropiane”, për të ndihmuar në ulje të tensioneve.
Gjuha e urrejtjes ndaj kryeministrit të Kosovës nga presidenti i Serbisë është e papranueshme. Ajo dëshmon se lidershipi serb nuk është ndarë nga e shkuara. Kosova është shtet i pavarur dhe askush nuk mund ti imponohet me gjuhën e dhunës.
— Lulzim Basha (@lulzimbasha_al) December 2, 2022