Majko: I heq kapelen komunistit më ekstremist të rënë në Luftë

Komisioni i Ligjeve miratoi dje me votat e mazhorancës projektligjin ‘Për krijimin e Institutit të Studimeve për Kujtesën e Luftës së Dytë Botërore’.

Opozita tha se nuk e voton projektligjin pasi kjo është tallje me ish-të përndjekurit dhe shpenzim i kotë i parave. Kurse deputetja e mazhorancës, Olta Xhaçka tha se ajo nuk ka qenë një luftë civile.

Kjo solli një debat të ashpër.

Më poshtë pjesë të zbardhura nga gazeta ‘Panorama’.

***

Petrit Vasili: E gjithë veprimtaria antifashiste u udhëhoq nga partizanët. Për çështjet kush qenë fituesit dhe kush qenë humbësit, dhe kush u ul në tavolinën e fituesve, kjo nuk lëviz.

Oerd Bylykbashi: Jam i sgiurt që me idenë që keni ju, do vazhdoni ta mbani mitin e 28 mijë dëshmorëve. Nuk ka për të bërë asnjëri tentativën minimale për të thënë të vërtetën.

Pandeli Majko: Ajo që po ju them miq, është se ne nuk ju kemi ftuar të votoni ndonjë variant historie. Gjeni shtresën tuaj që do vendosni ta respektoni.

Oerd Bylykbashi: Ju flisni për komunistët…

Pandeli Majko: Flisni për të përndjekurit… jam thellësisht në krahun tuaj, nëse do të vendosni të merreni me të përndjekurit. Pyeti sot të përndjekurit si po trajtohen nga kjo qeveri.

Oerd Bylykbashi: Të paktën të kërkoni falje për atë që nuk e keni bërë…

Pandeli Majko: Nuk po të kthej përgjigje, se the që kam paraardhës që kanë qenë pjesë e LANÇ.

Oerd Bylykbashi: Sigurisht kam edhe nga ata që kanë shkuar në burg menjëherë me LANÇ-in. Kanë shkuar në burg.

Pandeli Majko: Të garantoj që në krahun tonë ka njerëz që kanë qenë me LANÇ-in dhe kanë pasur probleme gjatë periudhës. Por ne po flasim për Luftën e Dytë Botërore dhe atë që meriton respekt…

Të luftosh dhe të biesh kundër okupatorit, qofsh edhe komunisti më ekstrem, meriton të të hiqet kapela.

Oerd Bylykbashi: Si Abaz Kupi…

Pandeli Majko: Më dëgjove çfarë thashë? Edhe komunisti më ekstremist, po ka rënë në krye të luftës duke mbrojtur atdheun, meriton t’i hiqet kapela. Kaq.