Mbi 500 të shtruar, Manastirliu: Sot hapim spitalet Covid në Durrës e Shkodër

Covid-19 vijon që të jetë me shifra të larta në Shqipëri, aq sa ka detyruar autoritetet që të marrin masa të tjera. Ministrja e Shëndetësisë, Ogerta Manastirliu tha se dje vendi ka kaluar më shumë se 500 të shtruar në 4 spitalet Covid në Tiranë.

Në fjalën e saj në seancën e kësaj të hënë në Kuvend, ajo bëri me dije se sot do të hapen spitalet rajonale në Durrës e Shkodër. ”Kemi arritur më shumë se 500 të shtruar në 4 spitalet Covid. Do aktivizojmë nga sot, spitalet rajonale. nisim me Durrësin e Shkodrën. Dhe më tej me Vlorën, Korçën dhe Elbasanin. Më pas vijojmë në skenarët e tjerë”,-tha ajo.

Mbi 7 mijë doza të tjera nga kontrata me Pfizer, vijnë mbrëmjen e sotme. ”7020 doza do të vijnë sot nga kontrata me Pfizer. Është e treta e një serie furnizimesh. Sepse ne do të vazhdojmë të lëvizim çdo gurë, për të siguruar vaksinimin e qytetarëve. Do të vijojmë me Covax-in me dozat e Astra Zeneca, që pritet të vijnë me vijimin e procedurave të Covax, si dhe me shtetet partnere, për të siguruar më shumë doza vaksine”, tha Manastirliu.