Meidani: Duhen zgjedhje të reja, Rama të kërkojë falje

Ish-presidenti Rexhep Meidani medon se vendi duhet të shkojë në zgjedhje të reja parlamentare e ndoshta edhe lokale, për shkak të depërtimit të elementëve kriminalë në politikë.

Në një intervistë për Panoramën, Meidani thotë se Edi Rama është përgjegjës “që u bëmë gazi i botës” me kandidaturat.

“Duhet pastuar me shpejtësi ndotja institucionale e deritanishme në nivel qendror e lokal, apo në administratat përkatëse. Pse jo, deri duke organizuar zgjedhje të reja parlamentare ose zgjedhje të pjesshme lokale. Sidomos kur dëgjohen pohime të llojit: nëse deputetët bëjnë atë që bëra unë, parlamenti mbetet me 70 deputetë”.

Sipas Meidanit, Rama duhet të kërkojë falje publike qytetarëve dhe anëtarësisë së PS.

Ai shton se Rama e ka bërë PS-në një parti klienteliste.

“PS e sotme, nga një parti e hapur, kolegjiale dhe liberale, është shndërruar në një parti klienteliste, unitare dhe autoritare, me veçori të ekzagjëruara të drejtimit ‘presidencial’. E thënë më thjesht, në përzgjedhjet e viteve të fundit ka gisht kryetari dhe një klientelë e vogël përreth tij, jo forumet dhe strukturat e partisë”.

Meidani e quan emailin e Ramës për ministrat një arrogancë dhe fyerje dinjiteti për anëtarët e kabinetit.

Duke komentuar aksionin e fundit anti-informalitet, Meidani thotë se përtej sukseseve që deklarohen, mbledhja e të ardhurave është larg planit dhe kjo “diku për paqartësi konceptore, diku për paaftësi individuale dhe diku për evazion dhe mitmarrje”.