Meta pret ambasadoren e Islandës: Bashkëpunim ekonomik e kulturor

Kryetari i Kuvendit Ilir Meta ka pritur sot ambasadoren e Islandës në Shqipëri (rezidente në Stockholm) Estrid Brekkan, me të cilën vlerësuan nivelin shumë të mirë të marrëdhënieve politike dypalëshe dhe atë në nivel ndërkombëtar.

Në këtë takim, Meta u shpreh se bashkëpunimi ekonomik e kulturor mes Shqipërisë dhe Islandës duhet ngritur në një nivel më të lartë ndaj Kuvendi do të jetë i hapur për të kontribuuar në këtë drejtim.

Kreu i Kuvendit nënvizoi gjithashtu se kompletimi i kuadrit ligjor veçanërisht në drejtim të nxitjes së investimeve do të ndikonte ndjeshëm në shkëmbimet dypalëshe. Ndërkohë ambasadorja e Islandës shprehu interesin e palës islandeze për intensifikimin e marrëdhënieve të gjithanshme me interes të përbashkët.

Estrid Brekkan theksoi se rritja e fluksit të shkëmbimeve politike e njerëzore, veçanërisht në planin ndërparlamentar do të shtonte edhe interesin reciprok për më tepër shkëmbime tregtare në të ardhmen.