Mini-Shengen i cunguar në Tiranë

Në Durrës, sot dhe nesër do të organizohet Samiti i tretë për ”Mini-Shengenin Ballkanik”, pas atij të Novi Sadit të Serbisë që ishte i pari dhe të dytit në Ohër të Maqedonisë së Veriut. Por në këtë samit, do të jenë vetëm 3 shtete të Ballkanit Perëndimor. Shqipëria, Serbia dhe Maqedonia e Veriut dhe mungojnë vende si Mali i Zi, Kroacia, Bosnje-Hercegovian dhe pa Kosovën. Pa hezitim mund të themi që kemi të bëjmë me një ”Mini-Shengen” të cunguar.

Në Kosovë është kundërshtuar në mënyrë kategorike përfshirja në një iniciativë rajonale, apo siç tashmë po quhet nisma për një “Mini-Shengen Ballkanik”, ku synohet vendosja e një bashkëpunimi më intensiv ekonomik përmes lëvizjes së lirë të njerëzve dhe mallrave.

Ministrja e Ekonomisë e Malit të Zi, Dragica Sekuliq, hodhi poshtë idenë për t’iu bashkuar një versioni ballkanik të zonës Shengen, e cila do të shihte heqjen e pengesave për tregtinë e lirë dhe udhëtimet midis Shqipërisë, Maqedonisë së Veriut, Serbisë, Kosovës e Bosnje-Hercegovinës. Ministrja Sekuliq ka thënë se bashkimi në nismën mini-Shengen për shtetet e Ballkanit e propozuar nga Shqipëria, Maqedonia e Veriut dhe Serbia do të ishte një humbje energjie.