Moskë, sulm terr*rist në një sallë koncertesh: Të paktën 40 të vdekur, qindra të plagosur

Pesë burra të maskuar dhe të armatosur hapën zjarr në sallën e koncerteve në ”Crocus City Hall” në Moskë, duke lënë të vdekur të pakën 40 persona dhe 100 të plagosur. Agjencia e lajmeve Tass shkruan se sulmuesit përdorën mitralozë. Ria Novosti thotë se personat e armatosur gjithashtu “hodhën një granatë, duke ndezur një zjarr”, e më pas kanë qëlluar ndaj qytetarëve.

Pas të shtënave masive në sallën e koncerteve në qendrën tregtare “Crocus City” në Moskë më herët gjatë mbrëmjes së sotme, kryetari i bashkisë së qytetit njoftoi në kanalin e tij zyrtar Telegram se po vendosen masa të veçanta sigurie për shkak të rrezikut të sulmeve të reja.

Kryetari i bashkisë së Moskës, Sergey Sobyanin, deklaroi se të gjitha ngjarjet sportive, kulturore dhe të tjera masive në kryeqytetin e Rusisë do të anulohen.

Gjithashtu, masat e sigurisë janë shtuar në aeroporte, ndërsa udhëtarët këshillohen të mbërrijnë herët për fluturimet e tyre.

Në të shtënat masive në “Crocus City”, sipas shërbimeve të urgjencës, 40 persona humbën jetën, mbi 100 u plagosën dhe më shumë se 100 prej tyre mbetën të bllokuar në godinën e qendrës tregtare, çatia e së cilës mori flakë, pasi pas të shtënave ka pasur edhe dy shpërthime.

Për ngjarjen e rëndë ka reaguar dhe SHBA. John Kirby, zëdhënësi i Këshillit të Sigurisë Kombëtare, tha se Shtëpia e Bardhë po punon për të mbledhur më shumë informacion mbi sulmin.

“Mendimet tona padyshim shkojnë te viktimat e këtij sulmi të tmerrshëm,” tha ai në një konferencë shtypi.

Departamenti Amerikan i Shtetit u ka dërguar një njoftim amerikanëve në Moskë për të shmangur tubimet më të mëdha “për sigurinë e tyre”, tha ai. Ai gjithashtu kërkoi që shtetasit amerikanë të qëndrojnë në kontakt me Departamentin e Shtetit për përditësime dhe informacione të mëtejshme. Kujtojmë se më 7 mars ambasada e SHBA paralajmëroi qytetarët e saj që të shmangnin turmat dhe tubimet në Moskë.

Kronika nga “Zëri i Amerikës”:

Agjencia shtetërore ruse e lajmeve Tass tha se të paktën 40 vetë janë vrarë dhe mbi 100 të tjerë janë plagosur në një sulm nga persona të armatosur të premten në një sallë koncertesh në Moskë. Salla e koncerteve është djegur gjatë sulmit nga disa persona të armatosur. Agjencia më e lartë ruse e sigurisë, Shërbimi Federal i Sigurisë, konfirmoi sulmin por nuk dha hollësi mbi autorët apo numrin e viktimave. Zyrtarët e kësaj agjencia thanë se janë marrë të gjitha masat e nevojshme për trajtimin e situatës.

Ministria e Shëndetësisë e Rusisë tha se disa nga të lënduarit janë dërguar tashmë për trajtim në spitale.

Agjencia e lajmeve Reuters njoftoi se pesë persona të armatosur hynë në sallën e koncerteve “Crocus City Hall” afër Moskës dhe qëlluan me armë automatike në drejtim të turmës që po ndiqte koncertin e grupit muzikor “Picnic”.

Sulmi, që duket të jetë terrorist, vjen disa ditë pasi Presidenti Vladimir Putin çimentoi kontrollin e tij në vend, duke orkestruar një fitore të thellë në zgjedhjet presidenciale në Rusi.