MPJ nuk ka asnjë info nga Beogradi për takimin Vuçiç-Rama

Politikë E Premte, 30 Prill 2021 06:18

Ministria e Punëve të Jashtme të Shqipërisë bëri të ditur për ABCnews se Tirana zyrtare nuk ka asnjë njoftim nga autoritetet serbe për një takim mes kryeministrave Vucic dhe Rama, për të cilin mediat e Beogradit thanë se do të zhvillohej në Nish. MPJ mohoi gjithashtu zërat për një pakënaqësi të Prishtinës zyrtare në lidhje me përfaqësimin e autoriteteve të Kosovës në këtë takim të përfolur.
Takimi i përforlur mes Aleksandër Vucic dhe homologut të tij shqiptar Edi Rama, për të cilin mediat serbe bënë të ditur se do të realizohet në Nish, duket se ekziston vetëm në nivel deklaratash. Ministria e Punëve të Jashtme në Tiranë, e kontaktuar nga ABCnews, bëri të ditur se pala shqiptare nuk ka asnjë njoftim përsa i përket një takimi të tillë, qoftë në rrugë zyrtare qoftë përmes komunikimeve të nivelit të lartë politik me Beogradin.

I pari që foli për një takim të tillë me Ramën ishte Kryeministri serb Vucic, gjatë një konference për shtyp me zv/presidentin amerikan Biden. Me këtë rast, kreu i Qeverisë së Beogradit shtoi se në takimin mes tij dhe Ramës ishin ftuar edhe përfaqësues nga Kosova. Deklarata u pasua nga njoftime të mediave serbe, sipas të cilave në këtë takim nuk do të merrnin pjesë as Presidenti Thaçi as Kryeministri i Kosovës, Isa Mustafa, por një nivel më i ulët përfaqësimi.

Informacione jo zyrtare folën për një pakënaqësi të Prishtinës ndaj autoriteteve të Tiranës zyrtare. Por kjo mohohet nga Minia e Punëve të Jashtme të Shqipërisë. Glevin Dervishi, këshilltar për mediat i ministrit Bushati, i kontaktuar nga ABCnews theksoi se nuk ka pasur asnjë notë të tillë zyrtare apo komunikim jo formal, përmes të cilit Prishtina të ketë shprehur ndonjë lloj pakënaqësie ndaj Tiranës zyrtare.

Me këtë rast, zyra e shtypit pranë MPJ-së theksoi se qëllimi i Shqipërisë nuk është t’i mbivendoset Kosovës por të respektojë gjithmonë vullnetin e saj, duke i qëndruar në krah.