Ndërron jetë gazetari i njohur Artur Zheji

Gazetari dhe analisti i njohur Artur Zheji ka ndërruar jetë sot në moshën 64-vjeçare, pas një arresti kardiak. Figura e njohur e medias shqiptare, Zheji ka kontribuar për dekada në gazetari, analizë politike dhe publicistikë.

Ai ishte duke drekuar me bashkëshorten dhe djalin në një restorant në rrugën “Butrinti”, kur dyshohet se ka pësuar një arrest kardiak.

Zheji u transportua me urgjencë me autoambulancë drejt spitalit “Petro Nako” në Sarandë, por fatkeqësisht mbërriti atje i pa jetë.

Artur Zheji, i lindur më 29 gusht 1961, ishte një nga figurat më të njohura të gazetarisë dhe publicistikës në Shqipëri, me një karrierë disa dekadëshe. Ai ka qenë autor dhe drejtues emisionesh televizive, analist politik dhe autor editorialesh që shpesh ngjallnin debat e reflektim publik.

Zheji ishte djali i eruditit të shquar shqiptar Petro Zheji dhe aktores së njohur shqiptare Besa Imami, duke u rritur në një familje me traditë të thellë kulturore e intelektuale.

Njoftimi i Policisë:

Rreth orës 16:10 ambulanca e Spitalit Rajonal Sarandë ka marr në afërsi të Restaurant Layos në rrugën Butrinti shtetasin Artur Petro Zheji i datëlindjes 26.09.1961 banues në Tiranë, i cili kishte probleme shendetesore. Ky shtetas ka ndërruar jetë gjatë transportit me Ambulancë.