Nis mbledhja e Komisionit të reformës në drejtësi, e pranishme dhe opozita

Pas disa ditëve pushim, komisoni i posaçëm i Reformës në Drejtësi ka nisur punën sot për tu njohur me vërejtjet e misionit të EURALIUS për opinionet e PD-së. Mbledhja e sotme do të ketë nënshqyrtim ligjin për rivlerësimin e gjyqtarëve dhe prokurorëve.

Në këtë mbledhje, është e pranishme dhe opozita, e cila ka vërejtjet e saja. Janë 10 çështje që Partia Demokratike kudërshton në ligjin për rivlerësimin e gjyqtarëve dhe prokurorëve, të argumentuara në detaj në një material prej 55 faqesh.

Oponenca e Partisë Demokratike nis që me tekstin e projektligjit, i cili sipas ekspertëve të selisë blu nuk detajon proçedurën e përzgjedhjes dhe emërimit të anëtarëve të organeve të rivlerësimit, si dhe proçesin e vlerësimit të kandidaturave, duke e lënë kështu këtë proçes në diskrecionin e organeve të përfshira në proçedurë.

Gjithashtu ekspertët demokratë i rikthehen sërish rolit të operacionit ndërkombëtar të monitorimit, të cilin nuk e gjejnë të pasqyruar mirë në ligj.

Në opinionin e tyre, demokratët kërkojnë dhe rishkimin e rolit të Inspektoratit të Lartë të Kontrollit të Pasurive dhe Drejtorisë së Sigurisë së Informacionit të Klasifikuar.