Nishani në OKB: Shqipëria mbështet përpjekjet për ndalimin e konflikteve

SHBA- Presidenti i Republikës Bujar Nishani deklaroi sot se Shqipëria mbetet e angazhuar në çështjet e integrimit dhe në stabilitetin rajonal.

Nga Asambleja e Përgjithshme e Kombeve të Bashkuara, ku mbajti një fjalim, Kreu i Shtetit theksoi se Shqipëria mbështet të gjitha përpjekjet për ndalimin e konflikteve.

“Vendi im mbetet besnik ndaj parimeve te OKB-së dhe kontribuon në mënyrë maksimale për paqen dhe sigurinë. Vendi im ka ndjeshmërinë e duhur ndaj sfidave për luftërat sot dhe mbështet të gjitha përpjekjet për ndalimin e konflikteve për të siguruar paqe e siguri. Janë fokusi ynë dhe kërkohet bashkëpunim i ngushtë dhe koordinim gjithashtu. Shqipëria është e angazhuar për të ndaluar krizat dhe kjo është fokusuar në stabilitetin rajonal, dhe zbatimit të marrëveshjeve. Shqipëria është një vend pilot në hartimin e indikatorëve globalë për paqe, drejtësi dhe institucione te forta”, deklaroi Nishani.

Ai foli edhe për Kosovën dhe raportet e saj me vendet e BE-së dhe më gjerë. Presidenti shprehu mbështetjen institucionale për aderimin e Kosovës në institucionet ndërkombëtare. Ai vlerësoi se Kosova ka bërë hapa përpara në disa fusha.