Lulzim Basha, i rikthyer politikës aktive dhe me nisjen e një turi ku po takon të rinjtë nëpër Shqipërisë, pohoi sot nga Vlora se nuk është penduar për vendimin e 9 shtatorit të vitit 2021 dhe i bën thirrje Sali Berishës që të ndjekë shembullin e lidershipit të tij dhe të bëj një hap pas për t’i hapur rrugë bashkimit të demokratëve.
”Sa më shumë kohë që kalon aq më i bindur jam se vendimi i 9 shtatorit ishte vendim i drejtë dhe mund të them që nëse ka diçka që mund të korrigjoja, është se ky vendim mund të ishte marrë edhe më herët për t’i çliruar demokratët nga pesha e rëndë e të kaluarës. Nuk është kurrë vonë për të hedhur hapin e duhur, ndaj dhe sot të hedhësh hapin e duhur është të reflektosh dhe rastin e tij të reflektojë dhe të tërhiqet, kurrë nuk është vonë”,-tha Basha.
Po ashtu ish-kreu i PD-së tha se numri i ulët i votuesve në 14 Maj tregoi se besimi tek politika është ulur shumë dhe kjo e bëri që të rikthehej në skenë. Listat e hapura, Vetting-u i politikanëve dhe kufizimi i mandateve janë zgjidhja për krizën politike sipas tij. Për t’i bërë realitet, Lulzim Basha i lë vetes afat zgjedhjet e vitit 2025 dhe shton se gjithçka do të bëhet në koordinim me faktorin ndërkombëtar.
