Seanca plenare ditën e sotme në Kuvend është zhvilluar me debate mes opozitës dhe maxhorancës. Deputetët e opozitës kërkuan zgjedhjen e Avokatit të ri të Popullit, për të cilin PD dhe PS ende nuk kanë një konsensus për emrin e titullarit të ri.
Opozita kërkoi që të futet në rend ditë këtë senacë, ose senacën e ardhshme që është e fundit për këtë legjislaturë.
“Rama nuk pranon kandidaturën që paraqet opozita, ndonëse ai plotëson çdo kriter. Rregulli ka qenë që avokati propozohet nga opozita dhe ju kërkoni të impononi përmes përjashtimeve pa asnjë kriter të kandidaturave që paraqet opozita, ti impononi kandidaturën”, tha Berisha.
Përgjigjen Berishës ia dha ministri Balla, i cili tha se ka qenë vetë opozita që s’ka dashur ta votojë, ndërsa i ftoi që të ulen dhe të ndërtojnë një proces për përzgjedhjen.
“Ju nuk mund të vini, o ky o ramë e vdiqëm. Peleshi në mënyrë të përsëritur, Çuçi dhe unë u kemi thënë ejani të ndërtojmë një proces. Ju mund të sillni 4 kandidatura, hiqen 2 me propozim të mazhorancës dhe shkohet me dy kandidaturat e mbetur për t’u votuar. Mos harroni asnjëherë që kërkohen 84 vota, në këtë legjislaturë nuk janë. Nuk keni dashur vetë ta zgjidhni”, tha Balla.
“Kam bërë një bisedë me Nokën në një nga seancat, e lamë që ta rimarrim këtë temë pas zgjedhjeve. Por besoj se ka ngelur një seancë dhe duket më e mundshme të vazhdojmë në shtator”, tha Peleshi.