Opozita në protestë! “Blindohet” Parlamenti, në terren 800 forca policie

Paraditen e sotme pritet të mbahet protesta e opozitës. Ndërkohë policia ka marrë masat, duke nxjerrë rreth 800 efektivë në terren. Efektivë nga Policia e Tiranës dhe Forcat e Sigurisë Kombëtare (FNSH) janë angazhuar për mbarëvajtjen e rendit dhe sigurisë. Masat janë marrë nga Drejtoria e Përgjithshme e Policisë së Shtetit në koordinim me DVP Tiranë.

Bëhet me dije se në perimetrin e Parlamentit janë instaluar kamera me rezolucion të lartë për të identifikuar çdo lëvizje të protestuesve që policia të ketë të gjitha provat e mundshme nëse do të ketë incidente.

Ndërkohë RENEA është në gatishmëri në rast se do të ketë incidente. Po ashtu edhe autobotë me ujë ndodhen në pjesën e pasme të parlamentit, nëse do të jetë e nevojshme për të ndërhyrë.