Parlamenti mblidhet më 29 maj, por nuk ka të drejtë të kalojë ligje. Ja çfarë do të shqyrtojë

Deputetët do t’i rikthehen jetës parlamentare, pas një mungese të gjatë si pasojë e zgjedhjeve të përgjithshme. Të enjten më 29 maj, deputetët do të jenë në seancën plenare të orës 12:00. Sipas kalendarit zyrtar, puna parlamentare do të vijojë deri më 8 korrik.

Në këtë periudhë tranzitore, përpara se të nisë legjislatura e re, në Kuvend pritet të mbahen raportimet vjetore të të gjitha institucioneve publike, nga ato kushtetuese e deri te agjencitë e pavarura.

Gjatë kësaj periudhe nuk do të shqyrtohen ligje të reja, pasi, sipas Kushtetutës është e ndaluar miratimi i ligjeve 60 ditë përpara se t’u mbarojë mandati deputetëve. Pritet që më 9 shtator të mblidhet Kuvendi i ri i dalë nga zgjedhjet e 11 majit. Në këtë seancë të parë, do të betohen deputetët e rinj, si edhe do të zgjidhet kryetari i ri i Kuvendit.