I ftuar në Syri TV, përballë gazetares Armela Ferko, Sekretari i Përgjithshëm i PD, Gazment Bardhi ka përshëndetur vendimin e presidentit të Republikës Ilir Meta për të kallëzuar penalisht kryetarin e Komisionit të Emërimeve në Drejtësi, Ardian Dvorani.
Sipas Bardhit, kreu i KED ka kulturë nën zero në respektimin e Kushtetutës.
“Ardian Dvorani duhet të shkarkohet nga detyra e anëtarit të Gjykatës së Lartë, edhe pse qëndron në mënyrë flagrante në atë detyrë. Por mesa duket edhe veprimtaria e tij në krye të KED, Ardian Dvorani ka kulturë nën zero për respektimin e Kushtetutës. Një njeri politik që nuk respekton ligjin dhe kushtetutën.
Që tregon se veprimet e këtij personi kanë detyruar presidentin të ndërmarrë këtë akt të paprecedentë dhe të rrallë, por dinjitoz për mënyrën se si duhet të veprojë një shtet ligjor”, shtoi Bardhi.
Bardhi i është rikthyer edhe një herë “betimit” të Arta Vorpsit. Sipas tij, zonja Vorpsi, me aktin e djeshëm është ekspozuar si militante partiake.
“Është betuar në shtëpi para burrit, ose në selinë e Partisë Socialiste, dhe këtë deklaratë e ka çuar për ta legalizuar firmën te noteri. Sot duke injoruar institucionin e presidentit dhe ti drejtohet 4 anëtarëve të Gjykatës Kushtetuese “më jepni mandatin”. Kjo e bën të njëjtë me sjelljet e Taulant Ballës. Është provë e patjetërsueshme, e ekspozon atë si militante partie”, u shpreh Bardhi.
Sa i përket rezolutës së sotme, që mazhoranca miratoi në Kuvend, Bardhi u shpreh se, është diçka e pavlerë, me gafa të mëdha dhe e pazbatueshme ligjërisht për asnjë institucion.
“Rezoluta e sotme e Parlamentit ka të njëjtën vlerë me qëndrimet e mia në selinë e PD. Nuk ka asnjë vlerë ligjore dhe tregon për një kulturë mjaft të rrezikshme të kësaj qeverie mbi institucionet shtetërore. Në një akt të paprecedentë, Kuvendi i bën thirrje Gjykatës Kushtetuese të mos njohë dekretin e presidentit. Presidenti nuk është vartës i Kuvendit, as Gjykata Kushtetuese. Nuk mundet Kuvendi të cënojë ndarjen e pushteteve. Gjykata Kushtetuese nuk është Arta Vorpsi. Nuk merr as porosi, as urdhra nga Kuvendi”, deklaroi sekretari i përgjithshëm i Partisë Demokratike.