PD-LSI: Të përsëriten zgjedhjet në BERAT

Komisioni i Ankesave dhe Sanksioneve do të marrë sot vendimin lidhur me procesin e zgjedhjeve në qarkun e Beratit. Dy forcat kryesore opozitare, PD dhe LSI kanë paraqitur ankimime të ndryshme për këtë qark, por me thelb të njëjtë duke kërkuar pavlefshmëri të rezultatit dhe përsëritje të zgjedhjeve. Sot do të jepet vendimi i parë për ankesën e LSI, ndërsa në ditët në vijim vendimi për ankesën e PD. Nga ajo që do të thonë anëtarët e KAS për ankesën e LSI do të kuptohet dhe qëndrimi që do të mbajnë për ankesën e selisë blu. LSI humbi mandatin në këtë qark për 77 vota dhe sipas Kodit Zgjedhor, kur parregullsitë kanë ndikuar në rezultat shpallen zgjedhjet të pavlefshme në një zonë elektorale. Në disa qendra votimit, parregullsitë që kanë faktuar juristët e LSI tregojnë se janë manipuluar mijëra vota që kanë përmbysur rezultatin. Sipas LSI, në disa kuti votimi nuk përputhet numri i fletëve të votimit me personat që kanë marrë pjesë në proces. Pra, komisionerët e PS kanë mbushur kutitë. Në disa qendra votimi mungojnë firmat e votuesve që do të thotë se në kuti ka vota që janë llogaritur si të vlefshme, kur në fakt nuk pasur fare votues. Identifikimi elektronik në zonat rurale të Beratit nuk ka funksionuar dhe në mungesë të firmave të votuesve, askush nuk mund të thotë se ka pasur proces të rregullt. Këto janë vetëm një pjesë e vogël e provave që ka paraqitur LSI për Beratin dhe që tregojnë për diferencën prej 77 votash që duhet për një mandat të cilin e humbi padrejtëisht LSI. Argumentet që sollën përfaqësuesit e PS në KAS kundër ankesave të LSI ishte jo ligjor dhe fyes për inteligjencën çdo qytetari. Sipas tyre, që të shpallet mos njohja e rezultatit duhet të manipulimi të jetë 10 mijë vota, aq sa duhen për të marrë një mandat. Një argumentim i tillë është jo logjik, sepse mjaftojnë 2 kuti të manipuluara për të treguar se 77 votat e LSI janë vjedhur.

Ndërkohë Partia Demokratike ka paraqitur për Beratin një ankesë me të gjerë dhe kërkon marrjen e provave nga Prokuroria dhe SPAK për të dëshmuar vjedhjen masive të votave. PD thotë se si pjesë e shpalljes së pavlefshme të zgjedhjeve në këtë qark duhet të administrohet edhe vendimi i Këshillit të Bashkisë së Beratit për shpërndarjen e 10 milionë lekëve për tërmetin në prag të zgjedhjeve. Lekët janë ndarë disa ditë para zgjedhjeve dhe në Berat, realisht nuk pati dëme nga tërmeti si në Durrës dhe Tiranë. Po ashtu, bashkia e Beratit ka shtyrë pagesën e taksave dhe tarifave pas zgjedhjeve, një vendim që bie ndesh me Kodin Zgjedhor. Po në Berat, u kapën nga mbështetësit e PD makina me ushqime që përdoreshin për blerje vote. Një tjetër pikë e ankesës së PD është dhe shtimi fiktiv i punësimeve në bashkitë e këtij qarku. Pjesë e ankesave të PD dhe LSI janë dhe akuzat për blerje votash. Të dy partitë kanë bërë padi në prokurori ku akuzojnë kandidatët e PS se kanë blerë vota. Për këtë qëllim, juristët e dy partive kanë kërkuar nga KAS që të marrë dokumente shtesë për manipulimet nga SPAK, Prokuroria e Rrethit Berat, si dhe dokumente nga institucionet shtetërore që faktojnë kasapanën elektorale. Përgjigja e tre anëtarëve të KAS të zgjedhur nga PS,  ka qenë militante dhe jo ligjore. Sipas tyre, nuk është detyrë e KAS të mbledhë prova, por e palëve paditëse. Ndërkohë që KAS funksionon si gjykatë dhe kur një palë kërkon prova shtesë, gjykata është e detyruar të kërkojë administrimin e këtyre provave para se të jap vendimin. Mënyra sesi anëtarët e KAS të zgjedhur nga PS po trajtojnë çështjen e ankesave të opozitës është një tjetër vjedhje që po u bëhet zgjedhjeve nga mazhoranca. Berati, qarku për të cilin vendoset sot është simboli i problematikës dhe manipulimit të zgjedhjeve. Nëse KAS vulos rezultatin pro PS edhe në këtë qark ku manipulimet janë sheshit, atëhere procesi i ankesave nuk ka asnjë vlerë dhe institucionet e zgjedhore janë kthyer në zyra të PS.

Mili Xhani