Presidenti Meta viziton Arkipeshkvinë një mijëvjeçare të Tivarit

Presidenti i Republikës, Ilir Meta, në kuadër të vizitës zyrtare në Mal të Zi ka postuar këtë moment të veçantë nga vizita në Arkipeshkvinë një mijëvjeçare të Tivarit, e para vizitë e një Presidenti në këtë institucion kaq të shenjtë.

Kreu i Shtetit, shkruan më tej se është pritur nga Imzot Rrok Gjonlleshaj, me të cilin thotë se biseduan për rëndësinë e jashtëzakonshme që luan besimi në shërbim të bashkëjetesës.

”Shumë i lumtur të vizitoja Arkipeshkvinë një mijëvjeçare të Tivarit, ku u prita nga Imzot Rrok Gjonlleshaj, me të cilin biseduam për rëndësinë e jashtëzakonshme dhe universale që luan besimi në shërbim të bashkëjetesës dhe harmonisë sociale’‘,-shkruan Presidenti.

Më tej, Presidenti ka veçuar kontributin e madh që lanë kolosë si Pjetër Bogdani dhe Dom Simon Filipaj. ”Këtu kanë shërbyer shumë kolosë të besimit katolik, në veçanti i madhi Pjetër Bogdani si dhe përkthyesi i parë i Biblës në gjuhën shqipe, Dom Simon Filipaj”.

Ndërsa pak më parë Presidenti Meta vizitoi Katedralen “Shën Pjetrit Apostull” në Tivar. Dhe pas vizitës Presidenti shkroi në Facebook:

I impresionuar nga vizita në Katedralen e mrekullueshme të “Shën Pjetrit Apostull” në qytetin historik të Tivarit, ndërtuar edhe falë bujarisë së diasporës sonë dhe punës së jashtëzakonshme të mjeshtrave të arkitekturës, pikturës, skulpturës e punimit të gurit, të ardhur nga të gjitha trojet shqiptare. Përgëzova Dom Kelmend Spaçin dhe motrën Luljana Marku për përkushtimin ndaj besimtarëve dhe i falënderova për mikpritjen e ngrohtë.