Presidenti Meta viziton Muzeun Kombëtar me studentë të Universitetit të Tiranës

Presidenti i Republikës, Ilir Meta, ka vizituar Muzeun Kombëtar me disa studentë të Universitetit të Tiranës.

Kreu i shtetit, me anë të një statusi në “Facebook” shprehet se është e rëndësishme që historinë t’jua mësojmë brezave të rinj, duke garantuar të ardhmen e Atdheut.

Postimi i presidentit Ilir Meta:

Shumë i lumtur që së bashku me një grup studentësh nga Fakultete të ndryshme të Universitetit të Tiranës, të vizitoja sot pavionin e Pavarësisë në Muzeun Historik Kombëtar, ku është ekspozuar një pjesë e rëndësishme e epopesë së lavdishme të Luftës së Vlorës të vitit 1920.

Është thelbësore që historinë t’jua mësojmë brezave të rinj, duke garantuar të ardhmen e Atdheut. Nuk mund të lejojmë, që e shkuara të lihet në harresë, sepse siç na ka mësuar Ismail Qemali: “Një fëmijë që fle rritet. Një komb që fle vdes”.

Shqipëria duhet të jetë gjithmonë zgjuar në mbrojtje të lirisë, pasi ajo nuk fitohet një herë e përgjithmonë, por duhet mbrojtur në çdo kohë nga të gjithë. 🇦🇱