Qeveria miraton udhërrëfyesin që garanton investimet e huaja në vend

Qeveria shqiptare  është e angazhuar për të krijuar një klimë të favorshme për investimet vendase dhe të huaja, të cilat kanë efekt pozitiv në ekonominë vendase.

Këshilli i Ministrave miratoi në mbledhjen e fundit  udhërrëfyesin e politikës së investimeve të Qeverisë shqiptare, me qëllim nxitjen e investimev të huaja dhe rritjen ekonomike ne vend.

Sipas këtij vendimi , “Qeveria shqiptare për të nxitur dhe inkurajuar investimet në sektorin privat në vend, me qëllim përshpejtimin e rritjes dhe nxitjes së punësimit, si një ndër prioritetet e përcaktuara në Strategjinë Kombëtare për Zhvillim dhe Integrim 2015-2020, Strategjinë e Biznesit dhe Zhvillimit të Investimeve për periudhën 2014-2020, dhe duke synuar zbatimin e programit të reformave dhe  rritjen e përfitimeve për qytetarët shqiptarë ka përgatitur Udhërrëfyesin e politikës së investimeve”.

Ky udhërrëfyes parashtron parimet dhe disa prioritete të reformave për t’u zbatuar nga qeveria shqiptare për të mbështetur këtë objekti.

Zbatimi i reformave të paraqitura në këtë udhërrëfyes synon tërheqjen e investimeve, me qëllim zhvillimin e qëndrueshëm ekonomik të vendit, rritjen e eksporteve dhe gjenerimin e punësimit.

Qeveria shqiptare synon:

(a) të garantojë një sistem efikas, efektiv dhe transparent për tërheqjen dhe kryerjen e investimeve;

(b) të përmirësojë dhe të modernizojë kuadrin ligjor për investimet në përputhje me praktikat më të mira ndërkombëtare;

(c) të promovojë zhvillimin dhe zbatimin e standardeve e të praktikave më të mira ndërkombëtare në lidhje me investimet.