Qeveria premton paketë masash për mbrojtjen nga kriza energjetike

Qeveria do të shpalosë një paketë masash mbështetëse për konsumatorin familjar dhe biznesin e vogël, kjo për t’i mbrojtur nga kriza energjetike, që sipas tij pritet të prekë edhe vendin tonë.

Zv/kryeministri Arben Ahmetaj, tha sot se kryeministri Edi Rama ka ngritur një grup ndërinstitucional për të monitoruar çdo ditë situatën e energjisë.

“Shumë shpejt brenda javës kreu i qeverisë do të shpalosë vetë një paketë masat për mbrojtjen e qytetarëve dhe sipërmarrjes së vogël. Por në nevojë të qetësimit të konsumatorëve, ju them se ne do të vazhdojmë ta mbrojmë konsumatorin familjar dhe sipërmarrjet e vogla nga rritja e çmimeve”, tha Ahmetaj.

Po ashtu pas mbledhjes së Këshillit të Ministrave, Ahmetaj theksoi ndër të tjera se është e pashmangshme që Shqipëria të mos preket nga kriza, e cila siç tha ka përfshirë gjithë botën dhe është një kombinim faktorësh gjeopolitikë.

Zv.kryeministri theksoi se nga ana e Ministrisë së Infrastrukturës dhe Energjisë janë duke punuar për të garantuar furnizim të pandërprerë të energjisë dhe akses në tregun ndërkombëtar për të blerë energji të vazhdueshme.