Rama: Basha dhe Berisha janë dy kufoma politike në PD, dje mund të kishte vrasje mes tyre

Edi Rama ka dalë në një bashkëbisedim live me demokratët pas ngjarjeve të djeshme në zyrat qendrore të PD.

Ndër të tjera ai tha:

“Ky bashkëbisedim është shumë i veçantë sepse është një komunikim që i adresohet miqve demokratë në këtë rrjet social dhe përmes mediave që mbase do ta ndjekin këtë komunikim të gjithë demokratëve, njerëzve të zakonshëm, të arsyeshëm, prindër, familjarë, shqiptarë që për 1001 arsye i përkasin asaj pjese të kampit politik që identifikohet me PD-në tash 30 vjet. Ndodhia e djeshme ishte një ndodhi shumë e rëndë për demokratët pa diskutim, por ishte e rëndë dhe për shqiptarët e Shqipërinë. 3-4 miq të huaj më kanë marrë të pyesin nëse është e vërtetë që është sulmuar selia e opozitës nga mbështetësit e saj sepse lajmi mori dhenë. Një lajm absurd, befasues, sa i rëndë dhe aq qesharak që në një vend demokratik sulmohet me dhunë selia e partisë së opozitës nga vetë mbështetësit e saj. Është diçka e pandodhur kurrë në historinë e botës demokratike, diçka ekstreme, që shkon përtej çdo logjike dhe diçka që shumëkush mund të mendojë se për mua është e mirëseardhur, por në fakt jo. Një zhvillim i kësaj natyre që patjetër dobëson kundërshtarin politik, në fakt godet vendin, shoqërinë, të gjithë ngrehinën e kulturës politike e cila për të gjitha arsyet që dimë, përbën realisht një problem kjo kulturë politike e cila dje ka marrë një goditje të tmerrshme. Kjo shkon përtej dobësimit të kundërshtarit politik, është një shkatërrim që dëmton ngrehinën institucionale të këtij vendi, dëmton institucionin demokratik të opozitës patjetër, por edhe gjithë kornizën institucionale të vendit, dhe patjetër që kjo është përgjegjësia e dy personazheve që janë pa një vizion ardhmërie, pa një vizion politik”, tha Rama.

Për kryeministrin Rama dje u zhvillua një ngjarje mesjetare në mes të Tiranës, ku dy palë të ndara përgjysmë, njëra brenda e tjetra jashtë godinës, ishin gati edhe për gjakderdhje, që të merrnin kështjellën.

“Janë të dy pa asnjë mesazh politik, pikë e zezë. Ajo që përbën në fakt të vërtetën, është që këta dy personazhe janë e njëjta mbetje, e ndarë përgjysmë. Një mbetje për arsye të ndryshme e pariciklueshme në funksion të së ardhmes. Arsyeja pse jam sot këtu për të folur me demokratët, nuk janë këta të dy. Në sytë e mi, jo si kundërshtar i tyre, as si kryetar i shumicës qeverisëse, por si dikush që e ka ndjekur historinë politike të këtij vendi nga shumë afër në pozicione të ndryshme. Këta të dy janë njëri i ndarë në dy pasqyra.

Dje ajo shfaqje mesjetare në mes të Tiranës, me një palë brenda të karikuar me një sistem fortifikimi, dhe një ushtri jashtë e karikuar për të sulmuar me çekiçë, shkallë, varre, mund të kishte degjeneruar në gjakderdhje, në diçka të pangushëllueshme për PD, për demokratët, por edhe për shoqërinë tonë. Si njëri, dhe tjetri, të dyja kufomat politike që e kanë marrë peng atë parti, për fat të keq ishin papërgjegjshmërisht të gatshëm për marrjen e kështjellës me gjakun e demokratëve. Që të dy ishin gati të sakrifikonin njerëz. Policia dje ka pasur sfidën më të vështirë, sepse për herë të parë në historinë e vet, policia është sfiduar nga një ngjarje me potencial gjakderdhje në oborrin e një partie, jo për shkak të sulmit nga kundërshtarët, por për shkak të kacafytjes në oborr mes veti.

Një kacafytje barbare. Policia e stërvitur në tërë këto vite për të përballuar këtë lloj materie politike, këtë lloj qasjeje dhe këtë lloj drejtimi politik, që e përfshin dhunën si mjet politik në agresionin ndaj godinave, dje meritoi respektin e të gjithëve dhe sot meriton një falënderim shumë të posaçëm, sepse mbajti të njëjtin standard siç e ka krijuar në mbrojtjen e godinës së qeverisë nga kjo materie, nga kjo prurje, nga kjo turmë, e cila dje ishte e ndarë përgjysmë, njëra pjesë brenda, tjetra jashtë godinës.

Sulmet e të dy palëve ndaj policisë janë një shëmbëlltyrë e një të vërtete të hidhur se të dyja këto kufoma politike që kanë marrë peng PD-në janë shumë larg kulturës së shtetit, kulturës së ligjit dhe ligjshmërisë sepse janë në fakt e njëjta gjë, e njëjta mbetje politike e ndarë përgjysmë. Njëra më e vjetër, njëra më e re, por e njëjta mbetje e ndarë përgjysmë. E vjetër apo e re është e njëjta biologji po asgjë tjetër”, tha Rama.