Rama bojkotoi fjalimin e Presidentes së Kosovës, PDIU: Një njollë turpi! Thelloi ndarjen e shqiptarëve
Partia Drejtësi, Integrim dhe Unitet ka dalë sot me një reagim zyrtar, pas mungesës së kryeministrit Edi Rama gjatë fjalimit të Presidentes në detyrë të Kosovës, Vjosa Osmani.
PDIU e cilëson karrigen bosh të Edi Rames dje në parlament, një njollë turpi që flet shume. Sipas PDIU, Rama thelloi ndarjen e shqiptarëve duke mos qenë i pranishëm gjatë vizitës historike të Presidentes në detyrë të Kosovës, Vjosa Osmani, në Parlamentin e Shqipërisë dhe thotë se ai vlen aq sa çmimi që i ka vënë vetes me njollën e sotme.
DEKLARATA E PLOTË
Karrikja bosh e Edi Rames dje ne parlament, nje njolle turpi qe flet shume..
Pasi vendosi të ndajë Kosovën me tra dhe kthyer kufirin e pakapërcyeshëm, duke e ditur qartë që kjo dëmtonte interesat politikë dhe ekonomikë të mbarë shqiptarëve;
pasi shpiku minishengenin, që ringjallte edhe njëherë Federatën e ish-Jugosllavisë dhe priste në mes aspiratat e shqiptarëve;
pasi mbështeti dhe i dha zë marrëzisë së shkëmbimit të territoreve Kosovë-Serbi;
ai thelloi sot ndarjen e shqiptarëve duke mos qenë i pranishëm gjatë vizitës historike të Presidentes në detyrë të Kosovës, Vjosa Osmani, në Parlamentin e Shqipërisë. Edi Rama vlen aq sa çmimi që i ka vënë vetes me njollën e sotme.
PDIU shpreh mbështetjen e plotë për institucionin e Presidentit të Kosovës dhe institucionet e tjera të ngritura me djersë e gjak. Ne mbështesin luftën e shenjtë të UÇK-së dhe përçmojmë çdo nismë komisionesh të posaçme për të hetuar drejtësinë e saj.
Ne nuk falim vrasësit e fëmijëve, grave, të të pafajshmëve, qofshin në Veri apo në Jug të vendit tonë. Ne mbrojmë dinjitetin e luftëtarëve të UÇK-së të rënë në luftë, bash ashtu siç mbështesim martirët çamë që ranë theror pa shkelur vijën aq të ëndërruar të kufirit të Shqipërisë.
Këtë vijë, që Edi Rama është përpjekur vazhdimisht ta justifikojë, znj. Osmani sot e fshiu krejtësisht, ashtu siç i ka hije një shqiptari të mirë, duke treguar që vëllezërit nuk mund të ndahen as me kufi e as me tra.
Në fund, dëshirojmë të shprehim inkurajim e mirënjohje të thellë për çdo nismë që mundëson bashkimin e të rinjve në të dy anët tona. Vetëm kështu do të bashkohen mendjet dhe do të jemi një! Partia Drejtësi, Integrim dhe Unitet
