Rama: Çdo ngrehinë e ngritur në hapësirë publike apo zonë të mbrojtur do të rrafshohet! S’do të ketë asnjë tolerancë

“Sot do të bëhet një konfiskim i një kuazi pallati në Vlorë që është në shkelje të lejes së ndërtimit. Ky proces synon të bashkojë dy gjëra, s’kemi asnjë minutë për të humbur. Kemi marrë përsipër të mbyllim procesin e legalizimeve por ta harrojë kushdo qoftë që do të legalizohet çfarëdo qoftë në shkelje të ligjit.

Çdo ngrehinë e ngritur në cenim të hapësirë publike dhe zonave të mbrojtura, do të rrafshohet, nuk do të ketë asnjë tolerancë në këtë proces.

E gjithë skuadra e deputetëve të jenë pranë komuniteteve dhe të jenë në anën e shumicës dërrmuese të njerëzve që pengohen çdo ditë në jetën e tyre komunitare nga ata që me guxim të tepërt kanë pushtuar hapësirat publike.

Tirana është zona më e nxehtë, edhe për shkak të atraksionit të madh që ka, dhe nuk ka lagje e bllok banimi që të mos ketë zaptuesin e vet”, tha Rama ditën e sotme në mbledhje me deputetët e Tiranës.