Rama: Kompensim me vlerën e tregut për shtëpitë që preken nga ndërtimi i stadiumit në Shkodër

Në qytetin më të madh verilidnor të vendit do të shpërndahen rreth 700 certifikata legalizimesh, duke i dhënë kështu mundësinë pronarëve të tyre të gëzojnë shtëpitë , duke e kthyer ato në legjitime.

Gjatë fjalës së tij kryeministri Rama shpreh se po bëhen legalizime në një zonë ku, në 8 vjet u bënë 1400 të tilla nga 21 mijë deklarime.

“Në 7 muaj kemi bërë një punë kolosale për familje që presin prej vitesh. Me ndarjen e re territoriale do jetë më e lehtë që ky proces të ecë përpara”, tha Kryeminstri Rama.

Ndërsa kreu i Aluiznit Artan Lame u shpreh se po punohet për legalizimin e zonës brenda qytetit.

Kryeministri Edi Rama ka postuar një foto në rrjetin social “Twitter” per legalizimet falas që jane shpërndarë sot në Shkodër:  “Shkodër: 700 legalizime të tjera falas që e çojnë në më shumë se 1400 numrin për rrethin dmth më shumë se në 8 vjet:-)”.

Ndërkohë në lidhje me projektin për stadiumin, Rama ka shprehur vendosmërinë e Qeverisë për zbatimin e tij. Rama ka sqaruar se objektet që pengojnë zbatimin e projektit do të prishen vetëm pasi pronarët e shtëpive të kompensohen.

Këto sqarime Rama i bëri gjatë takimit me pronarët e këtyre shtëpive, të cilët prisnin prej disa orësh një sqarim nga Kreu i Qeverisë.

"Fillimisht do të bëjmë kompensimin e banesave me vlerën e tregut dhe më pas do të ndërhyhet vetëm në ato banesa që pengojnë zabtimin e projektit për rikonstruksionin e stadiumit Loro Boriçi", sqaroi Rama.

Në vijim ai shtoi se stadiumi do të bëhet sipas standardeve europiane.