Rama: Presim 6.5 milionë pasagjerë këtë vit, objektivi i 10 milionë turistëve më i afërt

Kryeministri Edi Rama thotë se Aeroporti Ndërkombëtar i Tiranës është aeroporti i vetëm në Europë që ka tejkaluar 100 % të rikuperimit pas pandemisë. Gjatë inagurimit të kompanisë “Ryanair” në aeroportin e Rinasit, Rama solli në vëmendje të dhënat e Aviacionit Europian, që e rendisin aeroportin e Rinasit të parin në Europë referuar këtij treguesi.

“Shifra e vitit të shkuar ishte 123 % plus. Aeroporti i dytë ishte ai i Stambollit me 92 % dhe pastaj vinin të tjerët”, tha Rama. Po ashtu kreu i qeverisë solli në vëmendje faktin se vjet në Rinas janë përpunuar 5.2 milionë pasagjerë, një shifër e paimagjinueshme deri pak vite më parë.

“Këtë vit projeksioni ynë është 6.5 milionë pasagjerë, ndërsa ambicia e kompanisë është të prekë shifrën e 7 milionëve. 5.2 milionë pasagjerë të vitit të shkuar ishte objektiv i vitit 2027 dhe u arrit vjet”, tha Rama.

Kryeministri shprehu bindjen se objektivi i 10 milionë turistëve do të arrihet brenda një kohe shumë të shkurtër dhe jo në vitin 2030.