Fakti që Presidenti serb Vuçiç erdhi në Shqipëri dhe shprehu dhembshurinë për viktimat e tërmetit, por nuk njeh krimet e ushtrisë serbe kundër shqiptarëve të Kosovës e kanë bërë të padobishme praninë e zyrtarëve të Kosovës në këtë takim. Edi Rama e vendosi dukshëm Kosovën në pozitë të vështirë sa edhe miku i tij, Presidenti Hashim Thaçi e refuzoi ftesën për të marrë pjesë në takimin e rajonit.
Edi Rama po bën realitet idenë tij dhe të Aleksandër Vuçiç për “vëllazëri” mes Tiranës dhe Beogradit me një kosto shumë të rëndë për shqiptarët, dëmtimin e marrëdhënieve institucionale mes Shqipërisë dhe Kosovës. Samiti i Minishengenit Ballkanik që u mbajt dje në Tiranë është dëshmia më e qartë sesa e marrë është ideja Edi Ramës për të rregulluar marrëdhëniet me Serbinë, pa zgjidhur më parë çështjen e Kosovës dhe njohjen e saj si shtet nga Beogradi. Edi Rama thirri në Tiranë liderët e rajonit, me idenë e bashkëpunimit për heqjen e kufijve, doganave, taksave duke nxitur modelin e një bashkëpunimi si mes vendeve të Bashkimit Europian. Që në nisje ky takim ishte një gabim strategjik i politikës shtetërore të Shqipërisë, pasi dihej që Kosova nuk do të merrte pjesë. Vetë ideja e Minishengenit dëmton interesat e Kosovës, pa u njohur pavarësia e saj, por edhe zhvillimet para këtij takimi ishin të tilla që e pamundësonin praninë e politikanëve të Kosovës në Tiranë. Një javë para se të zhvillohej takimi, presidenti Aleksandër Vuçiç, jo rastësisht deklaroi se Masakra e Reçakut është një sajesë e shqiptarëve dhe Serbia nuk ka bërë krime. Bëhet fjalë për masakrën ku u vranë dhe therën 45 shqiptarë nga policia serbe në vitin 1999. Pas kësaj deklarate dhe pas qëndrimit të njohur që Serbia nuk e njeh si shtet Kosovën, çdo politikan i Prishtinës nuk mund të bëjë marrëzinë që të ulet në takime rajonale me Vuçiç me idenë e bashkëpunimit rajonal. Ky lloj bashkëpunimi nënkupton një marrëveshje mes shteteve që njohin kufijtë e njeri-tjetrit, ndërkohë Serbia thotë se nuk i njeh kufijtë e Kosovës. Për më tepër, që gjithë ideja e Minishengenit Ballkanik nuk vjen si një kërkesë e Shqipërisë, por si një axhendë e Beogradit që synon ekspansion ekonomik. Llogaritjet politike dhe ekonomike të tregut rajonal tregojnë se financiarisht është Serbia ajo që fiton më shumë përballë vendeve të tjera. Diplomatë të njohur në Tiranë dhe Prishtinë e shohin këtë projekt edhe si realizim të një “Jugosllavie të Re”, për shkak të pozitës dominuese që ka Serbia në tregun e rajonit. Këto dyshime si dhe fakti që Aleksandër Vuçiç vjen në Shqipëri dhe shpreh dhembshurinë për viktimat e tërmetit, por nuk njeh krimet e ushtrisë serbe kundër shqiptarëve të Kosovës e kanë bërë të padobishme praninë e zyrtarëve të Kosovës në këtë takim. Edi Rama e vendosi dukshëm Kosovën në pozitë të vështirë sa edhe miku i tij, Presidenti Hashim Thaçi e refuzoi ftesën për të marrë pjesë në takimin e rajonit.
Por në vend që kryeministri Edi Rama dhe këshilltarët e tij për politikën e jashtme dhe rajonin, nëse ka, të shohin problemin serioz që kanë prodhuar për Kosovën dje, pala e qeverisë thelloi dhe më tej krisjen e raporteve institucionale. Kryeministri Edi Rama në dy fjalime që mbajti për idenë e Minishengenit, shumicën e kohës e harxhoi për të sulmuar kryeministrin e Kosovës, Ramush Haradinaj dhe gjithë klasën politike në Prishtinë. Kreu i qeverisë shqiptare nuk është mjaftuar me kritika diplomatike, por me një gjuhë jo normale për një kryeministër ka akuzuar Haradinaj si gënjeshtar, mashtrues dhe politikan që nuk kupton situatën. Sulmet nuk kanë qenë vetëm ndaj Ramush Haradinaj, por edhe ndaj Hashim Thaçit, Albin Kurtit, Isa Mustafës dhe gjithë klasës politike të shtetit të Kosovës. Nuk është hera e parë që Edi Rama përdor një gjuhë të tillë fyese ndaj politikanëve, por ky nuk është rasti kur precedenti duhet përdorur si justifikim. Edi Rama flet si kryeministër i Shqipërisë dhe fyerja që i është bërë Kosovës është edhe më e rëndë. Sigurisht, shqiptarët nuk e përkrahin këtë gjuhë dhe dje janë ndjerë më të turpëruar kur dëgjojnë që kreu i qeverisë së tyre sulmon Kosovën me të njëjtën gjuhë si politikanët serbë. Sepse në të njëjtën linjë kundër Kosovës flet vetëm Vuçiç dhe kushdo politikan serb që nuk njeh Kosovën dhe do t’a dëmtojë atë. Ajo çfarë është e turpshme në samitin e djeshëm të Tiranës është se Aleksandër Vuçiç pati një aleat të ri kundër Kosovës. Fatkeqësisht ky ishte kryeministri i Shqipërisë që sulmonte Prishtinën nga Tirana, me të njëjtën gjuhë si Vuçiç.
Sido të jetë nisur dje kryeministri Rama, ka bërë një gabim të madh historik.
Mili Xhani