Rama zbarkon me 2 helikopterë dhe qindra policë në Ksamil. Tmerrohen pushuesit në bregdet

Kryeministri Edi Rama do të jetë këtë fundjave në Jug të vendit ku do të zhvillojë takime në kuadër të fushatës elektorale në Ksamil, Butrint, Sarandë e Delvinë.

Në mbrëmje Rama do të marrë pjesë në koncertin e Carla Brunit në qytetin antik të Butrintit. Por me sa duket kryeministri ka zgjedhur të udhëtojë me helikopter.

Sipas raportimeve, Rama ka mbërritur me një helikopter në Ksamil, duke u ulur në zonën e Kepit të Merlit. Ndërkohë që një helikopter tjetër vëzhgon zonën. Ndërkaq forca të shumta policia kanë rrethuar Ksamilin për të evituar ndonjë përplasje të mundshme të shefit të qeverisë me mbështetës të opozitës.

Prania e madhe e policisë ka tmerruar pushuesit e shumtë në këtë zonë. Vendosja e gjithë flotës së helikopterëve në funksion të kryeministri, si dhe qindra policë veç gardës së republikës që e shoqëron në çdo kohë duket e pajustifikueshme. Në qytetet ku do të zhvillojë vizitë Edi Rama nuk ka asnjë të dhënë për protesta kundër tij. Opozita ka thirrur sot qytetarët në protestën kombëtare në orën 20:00, para Kryeministrisë në Tiranë.