Reagon kryeparlamentari: S’më shqetësojnë intrigat moçalore

Kreu i Kuvendit dhe njëherësh lideri i LSI-së, Ilir Meta ka theksuar se e mbështet propozimin e ish-kryeministrit Sali Berisha për hetim ndërkombëtar për aferën e CEZ-it, por jo propozimin e liderit të PD-së, Lulzim Basha.

Konkretisht, në përfundim të takimit që zhvilloi me liderin e PDIU-së Shpëtim Idrizi, kryeparlamentari tha se propozimi i Berishës është për hetim ndërkombëtar për çështjen e CEZ-it dhe se nuk e mbështet idenë e Bashës që sipas tij është për moshetim të kësaj çështje.

“Problem është të mos takohemi dhe jo të takohemi. Nuk hyj në letrat e zotit Braho. Janë dy gjëra të ndryshme që kanë kërkuar i pafajshmi Basha dhe ajo e zotit Berisha. Unë kam mbështetur zotin Berisha, ndërsa Basha ka kërkuar moshetim ndërkombëtar. Dhe tashmë dihet publikisht se kur unë them po, është po”, tha Meta

Ndërsa i pyetur në lidhje me letrën e bërë publike dje nga deputeti i LSI-së, Spartak Braho, për një intrigë të mundshme ndaj tij, Meta tha se nuk e shqetësojnë dhe trembin aspak këto intriga moçalore.

“Me qetësi dhe dashuri, mund t'ju them se nga origjina ime, nuk më shqetëson asnjë lloj intrige moçalore”, përfundoi Meta.