Kryebashkiaku Erion Veliaj inaguroi rregullimin e rrugës “Leka i Madh”

Erion Veliaj, me sa duket, muajin gusht e ka muaj pune e jo plazhi. Pothuaj krejt bashkia ndodhet në punë.

Krahas shkollës së re “Murat Toptani”, banorët e Njësive 5 dhe 6 në kryeqytet kanë edhe një infrastrukturë rrugore dinjitoze.

Bashkia e Tiranës ka rikonstruktuar rrugët “Sabaudin Gabrani” dhe “Leka i Madh”, të cilat u vijnë në ndihmë mijëra familjeve në të dyja njësitë.

Veç asfaltimit dhe trotuareve, ato ofrojnë sinjalistikë moderne dhe rrjet të plotë kanalizimesh.

Kryetari i Bashkisë së Tiranës, Erion Veliaj falenderoi banorët që u treguan të gatshëm të bashkëpunonin për uljen e mureve rrethues dhe i ftoi ata që të kujdesen për mirëmbajtjen e investimit.

“Veç një shkolle të re, tani kemi edhe infrastrukturë të mirë. Kjo zonë ka qenë si toka e askujt, por, këmbëngulja e deputetit Majko dhe deputetes Balluku ka qenë që ta integrojmë të gjithë zonën. Në këtë vend kur dikur ka qenë një përrua i madh, sot kemi kanalizime për ujërat e zeza, ujërat e bardha, ka pika për mbledhjen e plehrave, është vendosur ndriçim LED. Dua vetëm që qytetarët ta mirëmbajnë, me të njëjtën frymë që kanë bashkëpunuar”, u shpreh Veliaj.