Rusia sulmon brenda 48 orëve. Pentagoni: Ushtria ruse gati në 80% të kapacitetit

SHBA-të kanë paralajmëruar sërish qeverinë e Ukrainës se sulmi i plotë rus është i afërt, dhe kjo mund të ndodh brenda 48 orëve të ardhshme.

Forcat ruse janë “pranë arritjes së 80% të kapacitetit”. Departamenti i Mbrojtjes thekson se presidenti Putin do të jap shumë shpejt urdhrin për sulm. “Vetëm në Detin e Zi janë rreth 12 anije luftarake ruse. Shumica janë gati për luftë”, tha ndër të tjera një zyrtar i Pentagonit.

Nga ana e saj, Ukraina pretendon se Rusia po kryen dhjetëra shkelje të armëpushimit dhe marrëveshjes së Minskut, dhe se ka brenda territorit të saj mbi 10 mijë ushtarë.

Një zyrtar tjetër i lartë amerikan i mbrojtjes në Uashington tha të mërkurën se forcat ruse të vendosura përgjatë kufirit me Ukrainën janë “gati” për fillimin e një sulmi, nëse marrin një urdhër për këtë.

Autoritetet amerikane kanë vlerësuar se Rusia ka mbi 150 mijë trupa përgjatë kufirit të Ukrainës me Rusinë dhe Bjellorusinë.

Rreth 80% e atyre forcave janë tani “në pozicione që ne do t’i konsideronim si të gatshme për sulm”, tha zyrtari, duke shtuar se ato ndodhen në një distancë prej 5 deri në 50 kilometrash nga kufiri. Zyrtari amerikan, që foli në kushte anonimiteti, shtoi se “ne ende nuk mund të konfirmojmë njoftimet se forcat ruse janë zhvendosur në Donbas, rajonin e Ukrainës lindore të kontrolluar nga seperatistët pro-rusë.

Zyrtari tha se Shtetet e Bashkuara kanë sinjale, të bazuara në informacione të shërbimeve të zbulimit dhe prova vizuale se “ato (forcat ruse) kanë avancuar gatishmërinë e tyre në një pikë, ku janë gati të fillojnë operacionet tani, nëse marrin urdhrin për këtë”.